Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 196 Hüküm no: 138 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’den küçük oğlu Hüseyin’e intikal eden Murad Vakfı’ndan kiralı harap evin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Aşcıbaşı mahallesi sükkânından iken bundan akdem vefât eden İbrahim b. ( ) nâm müteveffânın sulbî sagīr oğlu Hüseyin’in tesviye-i umûruna kıbel-i şer‘den mansûb vasîsi olan işbu râfi‘u’l-kitâb Mahmud Çelebi b. Mehmed meclis-i şer‘-i şerîf-i enverde bi’l-vesâye ikrâr ve takrîr-i kelâm edüp vasîsi olduğum sagīr-i mezbûrun babası müteveffâ-yı mezbûr İbrahim’in icâreteyn ile mutasarrıf olduğu Merhûm el-Hâc Murad Vakfı’ndan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât-ı ma‘lûmeyi hâvî vakıf menzil intikāl-i âdî ile sagīr-i mezbûr Hüseyin’e intikāl edüp lâkin menzil-i mezbûr harâba müşrif ve hâsılı harcına vefâ etmeyip sagīr-i mezbûru[n] ta‘mîr ve termîmi[n]e mâlı olmayıp zarû[re]t-i nafakası dahi olmağla menzil-i vakf-ı mezbûr ba‘de’l-müzâyedeti’ş-şer‘iye bedel-i misli ile âhara ferâğ ve bedeli istirbâh ve istiğlâl olunmak sagīr-i mezbûr hakkında evlâ ve enfa‘ olmağla hakīkat-i hâl vukūfu tâm [vukūf-ı tâmmı] olanlardan suâl olunup kıbel-i şer‘den izin ve hüccet-i mu‘tebere tahrîr ve i‘tâ olunması matlûbumdur dedikde fi’l-hakīka hâl vasîyy-i mezbûrun bâlâda tafsîl ve beyân ve şerh ve ayân eylediği vech üzere olduğunu zeyl-i kitâbda muharrerü’l-esâmî Müslimîn-i muvahhidîn haber vermeleriyle hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri menzil-i vakf-ı mezbûru ba‘de’l-müzâyede ve inkıtâ‘ı’r-rağbe bedel-i misli ile âhara ferâğa ve bedeli[n]i istirbâh ve istiğlâl etmek üzere vasîyy-i mezbûra izin vermeğin mâ-vaka‘a bi’t-taleb ketb olundu. Fî 3 min-Cumâdelâhire sene 1148. Şuhûdü’l-hâl: Müezzin-i mahalle-i Aşcıbaşı İbrahim b., Müezzin-i Otakcı Câbî-i Vakf Hüseyin Çelebi, Hüseyin Çelebi b. Ömer, Berber Mustafa Çelebi b. Himmet, Abdullah Çelebi b. Salih.