Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 213 Hüküm no: 156 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebapçı Hasan Beşe b. Ali’nin dükkânında bulunan kebapçılık alet, edevat ve malzemelerinin Ahmed b. Abdullah ve Mehmed’e satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin iken bundan akdem vefât eden Kebabî Hasan Beşe b. Ali’nin hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Abdullah ile sulbiye kebîre kızı Ümmühani Hatun’a ve li-ebeveyn kız karındaşı olup vilâyet-i Anadolu’da İzmir kazâsında sâkine Rahime Hatun bt. el-mezbûr Ali’ye münhasıra ve tashîh-i mes’elesi sekiz sehimden i‘tibâr olunup sihâm-ı mezbûreden bir sehmi zevcesi mezbûre Âişe Hatun’a ve dört sehmi kızı mezbûre Ümmühani Hatun’a ve bâkī üç sehmi kız karındaşı mezbûre Rahime’ye isâbeti tahakkukundan sonra müteveffâ-yı mezbûrun zevcesi mezbûre Âişe Hatun tarafından husûs-ı âti’l-beyânda [53a] vekîl olduğu zâtı[n]ı ma‘rifet-i şer‘iye ile ârifân Ahmed Çelebi b. Mustafa ve Salih Çelebi b. Mahmud şehâdetleriyle şer‘an sâbit ve sübût-i vekâletine hükm-i şer‘î lâhık olan Ahmed Efendi b. Derviş Ahmed ve mezbûre Rahime’nin hisse-i mevkūfesini ahz u kabz [ve] zabt u hıfza kıbel-i şer‘den vasî ve kayyım nasb olunup zâtı ta‘rîf-i şer‘î ile mu‘arrefe olan mezbûre Ümmühani Hatun meclis-i ma‘kūd-ı mezkûrda işbu râfi‘ayi’l-kitâb Ahmed b. Abdullah ve Mehmed b. ( ) muvâcehelerinde her biri bi’l-verâse ve bi’l-vekâle ve bi’l-vesâye ikrâr ve takrîr-i kelâm edüp medîne-i mezbûrede vâki‘ kebabî dükkânı beyne’l-hiref gedik i‘tibârıyla müteveffâ-yı mezbûrun ile’l-vefât taht-ı icâresinde olan dükkânın içünde mevcûd yedi sagīr sini ve yirmi beş kebab lengeri ve dört badiye ve bir sagīr kazgan ve on yedi sagīr ve kebîr tas ma‘a kapak ve iki sagīr tas ve bir saplı ayak ve bir kefgir ma‘a kefçe ve yüz elli kebab şişi ve bir demir kebab tâbesi ve bir kantar ve bir tâbe ile sâir âlât-ı mu‘ayyene-i mevcûdesi hırfet-i mezbûrûnun kethudâları ve sâir müsin [ve] ihtiyâr ustaları ve zeyl-i kitâbda muharrerü’l-esâmî <> Müslimînin tahmîn ve takvîmleri üzere yüz elli guruşa bâliğ ve semen-i misli olduğu ihbârlarıyla lede’ş-şer‘ zâhir olan meblağ-ı mezbûr yüz elli guruşa ale’l-iştirâki’s-seviy mezbûrân Ahmed ve Mehmed iştirâya tâlib ve râgıb olmalarıyla dükkân-ı mezbûrun gediğinde mevcûd yedi sagīr sini ve yirmi beş kebab lengeri ve dört badiye ve bir sagīr kazgan ve on yedi sagīr ve kebîr tas ma‘a kapak ve iki sagīr tas ve bir saplı ayak ve bir kefgir ma‘a kefçe ve yüz elli kebab şişi ve bir demir kebab tası ve bir kantar ve bir tâbe ile sâir âlât-ı mu‘ayyene-i mevcûdesini tarafeynden îcâb ve kabûlü hâvî bey‘-ı kat‘î ile semen-i misli olan meblağ-ı mezbûr yüz elli guruşa her birimiz bi’l-verâse ve bi’l-vekâle ve bi’l-vesâye mezbûrân Ahmed ve Mehmed Beşe’ye ale’l-iştirâki’s-seviy bey‘ ve temlîk ve teslîm eylediğimizde onlar dahi ber-vech-i muharrer iştirâ <> ve temellük ve tesellüm ve kabz ve kabûl eylediklerinden sonra semeni olan meblağ-ı mezbûr yüz elli guruşu mezbûrân Ahmed ve Mehmed yedlerinden her birimiz bi’l-verâse ve bi’l-vekâle ve bi’l-vesâye alıp kabz eyledik; ba‘de’l-yevm dükkân-ı mezbûrun gediğinde mevcûd yedi sagīr sini ve yirmi beş [kebab] lengeri ve dört badiye ve bir sagīr kazgan ve on yedi sagīr ve kebîr tas ma‘a kapak ve iki sagīr tas ve bir saplı ayak ve bir kefgir ma‘a kefçe ve yüz elli kebab şişi ve bir demir kebab tâbesi ve bir kantar ve bir tâbe ve sâir âlât-ı mu‘ayyene-i mevcûdesi mezbûrân Ahmed ve Mehmed’in ale’l-iştirâki’s-seviy mülk-i müşterâları ve hakk-ı sırfları olmuşdur; keyfe mâ yeşâ ve hasbemâ yehtâr mutasarrıfân olsunlar dediklerinde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Yakub Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 min-Cumâdelâhir sene semân ve erba‘în ve miete ve elf. Şuhûdü’l-hâl: Mustafa Efendi b. Ömer, Mehmed Çelebi b., Hüseyin Beşe b. Mehmed, Salih Çelebi b. Mahmud, Hüseyin Odabaşı b. Mustafa, Hüseyin Çelebi b. Ömer.