Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 212 Hüküm no: 155 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kebapçı Hasan Beşe b. Ali’nin terekesi Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin iken bundan akdem vefât eden Kebabî Hasan Beşe b. Ali’nin verâseti zevce-i menkûha-i metrûkesi Âişe Hatun bt. Abdullah ile sulbiye kebîre kızı Ümmühani Hatun’a ve li-ebeveyn kız karındaşı olup vilâyet-i Anadolu’da İzmir’de sâkine Rahime Hatun’a münhasıra olduğu şer‘an zâhir ve müte‘ayyin oldukdan sonra mezbûre Rahime Hatun’un hisse-i mevkūfesini ahz u kabz [ve] zabt u hıfza kıbel-i şer‘den vasî ve kayyım nasb olunan mezbûre Ümmühani Hatun ile zevcesi mezbûre Âişe Hatun’un tarafından vekîl-i müsbetesi Ahmed Efendi b. Ahmed taleb ve ma‘rifetleriyle tahrîr ve taksîm olunan tereke-i müteveffâ-yı mezbûrdur ki ber-vech-i âtî zikrolunur. Fi’l-yevmi’s-sâbi‘ min-Cemâziyelâhir li-seneti semân ve erba‘în ve miete ve elf. Köhne çuka dolama 1 [aded] 600 akçe Köhne çakşır 1 [aded] 30 akçe Köhne destâr 1 [aded] ma‘a kavuk 1 [aded] 60 akçe Köhne kuşak 1 [aded] 80 akçe Köhne don 1 [aded] ma‘a gömlek 1 [aded] 120 akçe Kebabcı dükkânında sini ve taşlar [taslar] ve şişler ve sâir âlât-ı gedik semeni 18.000 akçe Cem‘an yekûn 18.890 akçe Minhe’l-ihrâcât Techîz ve tekfîn 600 akçe Deyn-i müsbet-i Vakf-ı Silâhî Mehmed Bey bâ-hüccet 13.800 akçe Deyn-i müsbet-i mehr-i müeccel 3.000 akçe Harc-ı defter 120 akçe Kalemiye-i kâtib 40 akçe Cem‘an yekûn 17.560 akçe Sahhu’l-bâkī li’t-taksîm beyne’l-verese 1.330 akçe Hissetü’z-zevceti’l-mezbûre 166 akçe Hissetü’l-binti’l-mezbûre 665 akçe Hissetü’l-uhtü’l-mezbûre 449 akçe