Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 229 Hüküm no: 171 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanife Hatun bt. Derviş Ali’nin kocası Ömer Beşe b. Hüseyin ile babası Derviş Ali b. Mehmed’in miras hususunda birbirlerinin zimmetlerini ibra ettikleri Havâss-ı Refî‘a kazâsına tâbi‘ Papas nâm karyede sâkine iken bundan akdem vefât eden Hanife Hatun bt. Derviş Ali’nin verâseti zevc-i metrûkü Ömer Beşe b. Hüseyin ile babası mezbûr Derviş Ali b. Mehmed’e münhasıra olduğu şer‘an zâhir ve müte‘ayyin oldukdan sonra mezbûr Derviş Ali meclis-i şer‘-i şerîf-i enverde müteveffiye-i mezbûrenin zevci ve terekesine bi’l-verâse vâzı‘u’l-yed olan işbu râfi‘u’l-kitâb mezbûr Ömer Beşe mahzarında bi’l-verâse ikrâr ve takrîr-i kelâm edüp kızım müteveffiye-i mezbûrenin terekesi tahrîr ve ba‘de ihrâci’l-masârif ve’d-düyûn ber-mûceb-i defter-i kassâm-ı askerî hisseme isâbet eden altı bin iki yüz on altı akçeyi terekeden olmak üzere dâmadım mezbûr Ömer Beşe bana def‘ ve teslîm, ben dahi ber-vech-i muharrer meblağ-ı mezbûru yedinden tamamen ahz u kabz edüp meblağ-ı mezbûr altı bin iki yüz on altı akçeden mezbûr Ömer Beşe yedinde ve zimmetinde bir akçe ve bir habbe hakkım bâkī kalmayıp ba‘de’l-yevm kızım müteveffiye-i mezbûrenin terekesinden hâric-i ez-defter kalîl ve kesîr ve celîl ve hakīr hukūk-ı ma‘lûme ve mechûle mirasa müte‘allika âmme-i da‘vâdan mezbûr Ömer Beşe’nin zimmetini ibrâ-i âmm-ı [kātı‘u]’n-nizâ‘la ibrâ ve ıskāt edüp ol dahi kezâlik müteveffiye-i mezbûre Hanife ve kayınvâlidesi müteveffiye Fâtıma hatunların terekelerine müte‘allika âmme-i da‘vâdan mezbûr Derviş Ali’nin zimmetini ibrâ ve ıskāt edüp vechen mine’l-vücûh ve sebeben mine’l-esbâb kat‘a birbirimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Recebi’l-ferd li-seneti semân ve erba‘în ve miete ve elf. Şuhûdü’l-hâl: Abdi Çelebi b. Abdullah, Mehmed Çelebi b. Hüseyin, Mehmed Beşe b. Süleyman, Ahmed Beşe b. Abdullah, Halil Beşe b. Mustafa, es-Seyyid Mehmed b. es-Seyyid Mustafa, Mustafa Çelebi b. Çukadâr.