Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 230 Hüküm no: 172 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurşuncu Mehmed b. Osman’ın 5/9 ev hissesinin, Abdullah Odabaşı’ya satıldığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Fethi Çelebi mahallesinde sâkin iken bundan akdem vefât eden Kurşuncu el-Hâc Mehmed b. Osman’ın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti sulbî kebîr oğlu Abdullah Odabaşı ile sulbiye kebîre kızları İsmihan ve ve Fâtıma nâm hatunlara ve müteveffâ-yı mezbûrun câriye-i mavtûesi Mazlûme bt. Abdullah’ın batnında müstebînü’l-hılka hamle münhasıra ve müteveffâ-yı mezbûrun sülüs-i vasiyyeti olmağla tashîh-i mes’elesi dokuz sehimden i‘tibâr olunup sihâm-ı mezbûreden üç sehmi sülüs-i vesâyâsına ve iki sehmi oğlu mezbûr Abdullah Odabaşı’ya ve birer sehmi kızları mezbûretân İsmihan ve Fâtıma’dan her birine isâbeti ve iki sehmi haml-i merkūma tevkīfi tahakkukundan sonra müteveffâ-yı mezbûrun sülüs-i vesâyâsını tenfîze bâ-hüccet-i şer‘iye vasîyy-i muhtârı olan el-Hâc Ali Ağa b. Mustafa ile zâtları ta‘rîf-i şer‘î ile mu‘arrefe olan mezbûretân İsmihan ve Fâtıma hatunlardan her biri meclis-i ma‘kūd-ı mezkûrda müteveffâ-yı mezbûrun sulbî kebîr oğlu işbu râfi‘u’l-kitâb mezbûr Abdullah Odabaşı mahzarında her biri bi’l-vesâye ve bi’l-verâse ikrâr ve takrîr-i kelâm edüp müteveffâ-yı mezbûrun ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan el-Hâc Mustafa mülkü ve bir tarafdan Emetullah Hatun tasarrufunda olan vakıf menzil ve bir tarafdan Hüseyin Efendi Vakfı’ndan olan arsa-i hâliye ve bir tarafdan tarîk-ı âm ile mahdûd üç bâb fevkānî oda ve bir sofa ve dehliz ve bir bâb tahtânî oda ve matbah ocağı ve hâriciyesinde bir bâb oda ve bir kenîf ve müşterek su kuyusu ve ahır ve kenîf ve havluyu muhtevî mülk menzil cümle rızâsıyla ve kıbel-i şer‘den me’zûnen sûk-ı sultânîde ba‘de’l-müzâyede ve inkıtâ‘ı’r-rağbe semen-i misli olan beş yüz guruşda mezbûr Abdullah Odabaşı üzerinde karâr edüp ziyâde ile tâlib-i <<âhar zuhûr>> âharı olmamağla tashîh-i mezbûr üzere menzil-i mahdûd-ı mezkûrdan üç sehmi sülüs-i merkūm içün mezbûr el-Hâc Ali’ye ve iki sehmi mezbûretân İsmihan ve Fâtıma hisseleri içün meblağ-ı mezbûrdan iki yüz yetmiş yedi guruş isâbet etmekle menzil-i mezkûrda olan ber-minvâl-i muharrer hisse-i şâyi‘alarımızı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Abdullah Odabaşı’ya iki yüz yetmiş yedi guruşa her birimiz bi’l-vesâye ve bi’l-verâse bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz yetmiş yedi guruşu mezbûr Abdullah Odabaşı bizlere def‘ ve teslîm bizler dahi her birimiz bi-kadri’l-hısas tamamen ahz u kabz eyledik; ba‘de’l-yevm menzil-i mahdûd-ı mezkûrda olan beş sehim hisselerimizde bizim kat‘a alâka ve medhalimiz kalmayıp mezbûr Abdullah Odabaşı’nın mülk-i müşterâsı ve hakk-ı sırfı olmuşdur <> dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde [58a] ketb ü tahrîr ba‘dehû ma‘an ba‘s olunan Çukadâr Mustafa Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Recebi’l-ferd li-seneti semân ve erba‘în ve miete ve elf. Şuhûdü’l-hâl: el-Hâc Mehmed b., Hüseyin Efendi b. Mahmud, Ahmed Çelebi b. İsmail, Mehmed Çelebi b., Mustafa Beşe b., el-Hâc Mehmed b. Mehmed Efendi.