Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 236 Hüküm no: 176 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sadrazam İsmail Paşa’nın Bağdat Valisi iken Zurnazenbaşısı olan Hasan Ağa b. Hüseyin’in küçük çocukları Ahmed, Fatma ve Zeyneb’e vasî ve vasî nâzırı tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Ulucababa mahallesi ahâlîsinden olup hâlâ mesned-nişîn-i Sadâret-i uzmâ ve erîke-nişîn-i Vekâlet-i kübrâ olan cenâb-ı rükn-i âlî-şân-ı sadr-ı âsaf-nişân düstûr-ı ma‘delet-şi‘âr, müşîr-i Ferîdûn-vakār, mütemmimü mehâmmü’l-enâm, müdebbirü mesâlihi’l-havâs ve’l-avâm İsmail Paşa hazretleri sâbıkā Bağdad-ı bihişt-âbâdda vâlî oldukları eyyâmda müşârün-ileyh hazretlerinin Zurnazenbaşılık hizmetleriyle müşerref iken bi-emrillâhi te‘âlâ vefât eden Hasan Ağa b. Hüseyin’in medîne-i mezbûrede sâkineler oğlu Ahmed ile sulbiye sagīre kızları Fâtıma ve Zeyneb’in tesviye-i emirlerine kıbel-i şer‘den bir vasî nasbı lâzım ve mühim olmağın emânet ile ma‘rûf ve diyânet ile mevsûf, her vechile vesâyet uhdesinden gelmeğe kādir idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfi‘u’l-kitâb Ali Çelebi b. Ahmed’i hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrûn-ı mezbûrûnun tesviye-i emirlerine vasî nasb ve ta‘yîn ve sıgār-ı mezbûrenin vâlideleri Hanife Hatun bt. Ahmed’i dahi vasîyy-i merkūm üzerine hasbî nâzır nasb ve ta‘yîn eylediklerinde ol dahi vesâyet ve nezâret-i mezbûreyi kabûl ve hizmet-i lâzımelerin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Recebi’l-ferd li-seneti 1148. Şuhûdü’l-hâl: es-Seyyid Ahmed Ağa b. es-Seyyid Mehmed, Süleyman Ağa b. Abdullah, el-Hâc İbrahim b. Mustafa, Ahmed Ağa b. Kapıcızâde, Mehterbaşı Mehmed Ağa [b.] Hüseyin, Ahmed Ağa b. Mehmed, Mustafa Ağa b., el-Hâc Süleyman b. Abdullah, es-Seyyid Mehmed b. es-Seyyid Mustafa ve gayruhum mine’l-huzzâr.