Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 238 Hüküm no: 179 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in, küçük kızları Fatma ve Emine’ye intikal eden Kiremitçi Süleyman Vakfı’ndan kiralı evinin başkasına devrine mahkeme tarafından izin verildiği Medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem vefât eden Mehmed Bey b. ( ) sulbiye sagīre kızları Fâtıma ve Hadice’nin vâlideleri ve tesviye-i emirlerine bâ-hüccet-i şer‘iye vasiyyeleri olan işbu râfi‘atü’l-kitâb Âişe Hatun bt. Abdullah meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp sâlifü’z-zikr Kiremidci Süleyman <> Vakfı’ndan olup mahalle-i mezbûrede vâki‘ bir tarafdan Silâhdâr Ömer Ağa menzili ve bir tarafdan bostan ve bir tarafdan İbrahim Çelebi ve bir tarafdan tarîk-ı hâs ile mahdûd iki bâb fevkānî oda ve bir sofa ve bir tahtânî oda ve bir su kuyusu ve bir kenîf ve havluyu muhtevî menzil müteveffâ-yı mezbûrun ile’l-vefât bi’l-icâreteyn taht-ı tasarrufunda olup ba‘de vefâtihî bi’l-intikāli’l-âdî sagīretân-ı mezbûretâna intikāl edüp lâkin sagīretân-ı mezbûretânın ism[i] mâl ıtlâk olunur nesneleri olmayıp nafaka ve kisve[ye] eşedd-i ihtiyâc ile muhtâc olduklarından mâ‘dâ menzil-i mezkûr müşrif-i harâb ve mâil-i türâb olup ta‘mîr ve termîme sagīrelerin <> kudretleri dahi olmamağla menzil-i mahdûd-ı mezkûr sûk-ı sultânîde ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğat olunup bedeli istirbâh olunmak sagīretân-ı mezbûretân haklarında her vechile evlâ ve hayırlı olmağın menzil-i mahdûd-ı mezkûru ber-minvâl-i <> meşrûh âhara ferâğa kıbel-i şer‘[den] [60b] izin verilmek bi’l-vesâye matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer <> olmağın sâlifü’z-zikr menzili ber-vech-i meşrûh bedel-i misli ile âhara ferâğ ve bedelini kabz ve hâsıl olan nemâsından sagīretân-ı mezbûretânı infâk ve iksâ etmek üzere vasiyye-i mezbûre Âişe Hatun’a cânib-i eşra‘-ı [şer‘-i] mutahherden izin verilip mâ-vaka‘a bi’t-taleb ketb olundu. Fî 3 min-Şa‘bâni’l-mu‘azzam sene 1148. Şuhûdü’l-hâl: Feyzullah Efendi b. Nurullah, Yahya Efendi b. Ahmed, Ömer Efendi b. el-imâm, Yunus Beşe b. Mustafa, Mehmed Efendi [b.] Sâdık.