Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 248 Hüküm no: 188 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi b. Mehmed’in eşi Ümmühani Hatun bt. Abdullah ile kızı Fatma’nın, miras hususunda birbirlerinin zimmetlerini ibra ettikleri Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Kiremidci Süleyman mahallesinde sâkin iken bundan akdem vefât eden Süleyman Efendi b. Mehmed’in hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Ümmühani Hatun bt. Abdullah ile sulbiye kebîre kızı Fâtıma Hatun’a münhasıra <> ve tashîh-i mes’elesi sekiz sehimden i‘tibâr olunup sihâm-ı mezbûreden bir sehmi zevcesi mezbûreye ve bâkī yedi sehmi kızı mezbûre Ümmühani [Fâtıma] Hatun’a isâbeti tahakkukundan sonra zâtı Yakub Ağa b. Hasan ve Mehmed Ağa b. Abdurrahman ta‘rîfleriyle mu‘arrefe mezbûre Ümmühani Hatun meclis-i ma‘kūd-ı mezkûrda tereke-i müteveffâ-yı mezbûra bi’l-verâse vâzı‘atü’l-yed olan üvey kızı işbu râfi‘atü’l-kitâb mezbûre Ümmühani [Fâtıma] Hatun <> mahzarında ikrâr-ı tâm ve takrîr-i kelâm edüp zevcim müteveffâ-yı [64a] [mezbûr] Süleyman Efendi zimmetinde mütekarrir ve ma‘kūdün-aleyh otuz guruş mehr-i müeccel hakkım ile iktisâm <> olunan eşyâ ve nakidden tashîh-i mezbûr üzere hisseme isâbet eden iki yüz on bir buçuk guruş ki min-haysü’l-mecmû‘ iki yüz kırk bir buçuk guruşu üvey kızım mezbûre Fâtıma Hatun bana def‘ ü teslîm <> ben dahi ber-vech-i muharrer meblağayn-ı mezbûreteyn[i] yedinden bi’t-tamam ve’l-kemâl ahz u kabz edüp meblağayn-ı mezbûreteynden üvey kızım mezbûre Fâtıma Hatun’un yedinde ve zimmetinde bir akçe ve bir habbe hakkım bâkī kalmayıp ba‘de’l-yevm zevcim müteveffâ-yı mezbûrun terekesine müte‘allika âmme-i miras da‘vâsından üvey kızım mezbûre Fâtıma Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î zâtı <> kezâlik mu‘arrifân-ı mezbûrân ta‘rîfleriyle mu‘arrefe mezbûre Fâtıma Hatun meclis-i ma‘kūd-ı mezkûrda üvey vâlidesi mezbûre Ümmühani Hatun mahzarında ikrâr ve takrîr-i kelâm edüp ben dahi babam müteveffâ-yı mezbûr Süleyman Efendi’nin terekesine müte‘allika âmme-i miras da‘vâsından üvey vâlidem mezbûre Ümmühani Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim; vechen mine’l-vücûh ve sebeben mine’l-esbâb birbirimiz ile da‘vâ ve nizâ‘ımız kalmayıp eğer benden ve üvey vâlidem mezbûre Ümmühani Hatun’dan husûs-ı mezbûra müte‘allika da‘vâ ve nizâ‘ımız zuhûr ederse lede’l-hükkâmi’l-kirâm mesmû‘a olunmasın dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr İsmail Çelebi ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Şa‘bâni’l-mu‘azzam li-seneti semân ve erba‘în ve miete ve elf. Şuhûdü’l-hâl: el-Hâc Abdullah Efendi b. Habib, Mehmed Efendi b. Mustafa, Hasan Efendi b. Ali, İbrahim Çelebi b. Mehmed, Yakub b. Hasan, Ahmed Efendi b. Mustafa.