Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 247 Hüküm no: 187 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekerzâde Mustafa b. Mehmed’in, kendisine ait bir miktar tütün, ev eşyası vs. ile bir cariyesini kızları Emetullah ve Ayşe’ye, bedelinin bir kısmını kendilerine olan borcuna sayıp kalanından zimmetlerini ibra etmek suretiyle sattığı Medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Defter[dar] Kara Süleyman mahallesi sükkânından Tekerzâde demekle ma‘rûf el-Hâc Mustafa b. Mehmed meclis-i şer‘-i şerîf-i enverde ve mahfil-i dîn-i münîf-i ezherde sulbiye kebîre kızları olup zâtları <> Hoca Mehmed Efendi b. Mustafa ve es-Seyyid Mehmed b. es-Seyyid Mustafa ta‘rîfleriyle mu‘arrefe işbu râfi‘ayi’l-kitâb Emetullah ve Âişe nâm hatunlar muvâcehelerinde ikrâr ve takrîr-i kelâm edüp medîne-i mezbûrede (…) ticâret eylediğim dükkân içünde mevcûd olan yüz elli vukıyye duhanımı beher vukıyyesi yüzer akçeden on beş bin akçeye ve dükkân-ı mezbûr içünde mevcûd olup [63b] vasıf ve adedi beynimizde ma‘lûm âlât-ı mu‘ayyene (…) hurdevât-ı ma‘lûmeyi dahi üç bin akçeye ve yine evsâfı beynimizde ma‘lûm olup hurdevât-ı ma‘lûmeyi dahi üç bin akçeye ve yine evsâfı beynimizde ma‘lûm olup mahalle-i mezbûrede hâlâ sâkin olduğum menzilde mevcûd bir aded yorgan ve bir minder ve bir leğen ve bir sahan ve bir kadayıf tepsisi ve bir çuka ferâce dahi bi-safkatin vâhidetin üç bin yüz seksen akçeye ve ma‘lûmü’l-evsâf işbu hâzıra bi’l-meclis Hüsnüşâh nâm bir câriyeyi dahi dokuz bin akçeye ki zikrolunan duhan ve âlât ve eşyâ ve câriyeyi cem‘an otuz bin yüz seksen akçeye işbu kızlarım mezbûretân Emetullah ve Âişe’ye ber-vech-i meşrûh bey‘ ve teslîm eylediğimde onlar dahi ber-minvâl-i muharrer iştirâ ve tesellüm ve kabz ve kabûl eylediklerinden sonra meblağ-ı mezbûrun üç bin altı yüz akçesini kızlarım mezbûretânın bundan akdem müteveffiye vâlideleri Râbia Hatun’dan kendilere isâbet <> ve intikāl edüp ve ben bi’l-velâye kabz edüp ve masârifime sarfen istihlâk etmekle mezbûretâna deynim olan üç bin altı yüz akçeye takās eylediğimde onlar dahi ba‘de’l-mukāssa ve’l-kabûl eşyâ-i mezkûr semenlerinden mezbûretân zimmetlerinde bâkī kalan yirmi altı bin beş yüz seksen akçeye müte‘allika âmme-i de‘âvî ve kâffe-i mutâlebâtdan kızlarım mezbûretân Emetullah ve Âişe’nin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim; ba‘de’l-yevm bey‘ eylediğim sâlifü’z-zikr câriye ve duhan ve hurdevât ve eşyâ kızlarım mezbûretânın mülk-i müşterâları ve hakk-ı sırfları olup benim kat‘a alâka ve medhalim kalmadı dedikde her biri gıbbe’t-tasdîkı’l-mu‘teberi’l-vicâhî mâ-hüve’l-vâki‘ bi’t-taleb ketb olundu. Fi’l-yevmi’l-hâmis-aşer min-Recebi’l-ferd li-seneti semân ve erba‘în ve miete ve elf. Şuhûdü’l-hâl: İbrahim Efendi b. Abdullah, Ali Efendi b. Mehmed el-müezzin, İsmail Efendi b. Mehmed, Molla Mehmed b. Abdurrahman, Mustafa Çelebi b. Yusuf, <> Mehmed Sâdık Efendi [b.] Kâşânî Abdurrahman, İsmail Efendi b. Mehmed, Mehmed Beşe b. Abbas, Sipâhi el-Hâc Mustafa [b.] Hasan.