Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 253 Hüküm no: 192 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasköy Turşucu Mahallesi ahalisinden olup Rumeli’de Nevrekop kasabasında vefat eden Ebubekir Beşe b. İbrahim’in küçük oğlu İbrahim’e nafaka tayini Havâss-ı Refî‘a kazâsı muzâfâtından kasaba-i Hasköy’de Turşucu mahallesi ahâlîsinden olup vilâyet-i Rumeli’nde Nevrekop kasabasında müsâfiren sâkin [iken] bundan akdem vefât eden Ebûbekir Beşe b. el-Hâc İbrahim’in sulbî sagīr oğlu İbrahim’in tesviye-i umûruna vasîsi olan vâlidesi işbu râfi‘atü’l-kitâb Zeyneb Hatun bt. Hüseyin meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasîsi olduğum sagīr-i mezbûrun nafaka ve kisve-bahâya eşedd-i ihtiyâcı olmağla babası müteveffâ-yı mezbûrdan müntakıl akārâtından kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasîyy-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīr-i mezbûrun babası müteveffâ-yı [65b] mezbûrdan müntakıl akārâtından beher yevm sekizer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve-bahâsına harc ü sarfa ve lede’l-iktizâ istidâneye ve inde’z-zafer mâlına rücû‘a vasîyy-i mezbûra izin vermeğin mâ-vaka‘a bi’t-taleb ketb olundu. Fî-gurreti Ramazani’l-mübârek sene 1148. Şuhûdü’l-hâl: es-Seyyid Abdullah b. es-Seyyid Hüseyin, el-Hâc Mehmed Efendi b. İbrahim?, Ömer Beşe b. el-Hâc İbrahim?, el-Hâc Yusuf b. Mustafa, es-Seyyid Mehmed Ağa b. es-Seyyid Mustafa.