Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 255 Hüküm no: 194 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükköy ahalisinden Aleksi v. Apostol’un küçük çocukları Ligorski, Yanaki ve Tanaş’a nafaka tayini Havâss-ı Refî‘a kazâsına tâbi‘ Küçük nâm karyede mütemekkin iken bundan akdem hâlik olan Aleksi v. Apostol’un sulbî sagīr oğulları Ligorski ve Yanaki’nin ve Tanaş[‘ın] [Orijinal metinde satırın sonuna sonradan eklenmiştir.] anaları ve tesviye-i emirlerine bâ-hüccet-i şer‘iye vasiyyeleri olan işbu râfi‘atü’l-kitâb Balaşever bt. Yani nâm Nasrâniye meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasiyyeleri olduğum sagīrân-ı mezbûrânın nafaka ve kisve-bahâya eşedd-i ihtiyâclar[ı] olmağla babaları hâlik-i mersûmdan müntakıl mâllarından her birine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrûn-ı mezbûrûnun babaları hâlik-i mersûmdan müntakıl mâllarından her birine yevmî yirmişer akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīrûn-ı mezbûrûnun nafaka ve kisve-bahâlarına harc ve sarfa ve lede’l-iktizâ istidâneye ve inde’z-zafer mâllarına rücû‘a vasiyye-i mezbûre[ye] izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Ramazani’l-mübârek li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hüseyin, es-Seyyid Mehmed Ağa b. es-Seyyid Mustafa, Ahmed Efendi b. Mustafa, es-Seyyid Yakub Çelebi b. Ali.