Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 269 Hüküm no: 203 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun bt. Mustafa’nın eşi Veliyüddin Çelebi’nin ¼ ev hissesini diğer ¾ hissenin sahibi Rukiye Hatun b. Abdülbaki Ağa’ya sattığı Husûs-ı âti’l-beyânın mahâllinde ketb ü tahrîri içün savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkine iken bundan akdem vefât eden Afîfe Hatun bt. Mustafa’nın hayatında sâkine olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffât-ı mezbûrenin verâseti zevc-i metrûkü el-Hâc Veliyüddin ile sadriye kebîre kızı Rukiye Hatun bt. Abdülbaki Ağa’ya münhasıra ve tashîh-i mes’elesi dört sehimden i‘tibâr olunup sihâm-ı mezbûreden bir sehmi zevc-i mezbûr Veli Çelebi’ye ve bâkī üç sehmi kızı mezbûre Rukiye Hatun’a isâbeti tahakkukundan sonra mezbûr el-Hâc Veliyüddin Çelebi meclis-i ma‘kūd-ı mezkûrda müteveffât-ı mezbûrenin kızı işbu râfi‘atü’l-kitâb mezbûre Rukiye Hatun mahzarında bi’l-verâse ikrâr-ı tâm ve takrîr-i kelâm edüp zevcem müteveffât-ı mezbûrenin ile’l-vefât yedinde mülk ve hakkı idüği müsbet olup mahalle-i mezbûrede vâki‘ bir tarafdan İbrahim Paşa kerîmesi mülkü ve bir tarafdan dere ve bir tarafdan ( ) ve bir tarafdan tarîk-ı âm ile mahdûd dâhiliyesinde iki bâb fevkānî oda ve bir sofa ve iki bâb tahtânî oda ve kenîf ve bir matbah ve bir ahır ve iki su kuyusu ve bahçe ve hâriciyesinde iki bâb fevkānî oda ve bir kenîf ve bir ahır ve havluyu müştemil mülk menzilden bir sehim hissemi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûre Rukiye Hatun’a iki yüz yetmiş iki guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr iki yüz yetmiş iki guruşu mezbûre Rukiye Hatun yedinden tamamen ahz u kabz eyledim; ba‘de’l-yevm menzil-i mahdûd-ı mezkûrda olan bir sehim hisse-i şer‘iyem mezbûre Rukiye Hatun’un mülk-i müşterâsı ve hakk-ı sırfı olmuşdur; keyfe mâ yeşâ [teşâ] ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Hasan Ağa ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Şevvali’l-mükerrem li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa Efendi, es-Seyyid Mehmed b. es-Seyyid Mustafa, İsmail Efendi b. el-Hâc Osman, Osman Efendi b. İsmail Efendi, es-Seyyid Mehmed Efendi, es-Seyyid Halil Efendi b., es-Seyyid Mustafa Efendi, es-Seyyid Ahmed Efendi b., Mehmed Bey b. Mustafa.