Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 270 Hüküm no: 204 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi b. Mehmed Efendi’den küçük kızları Fatma ve Rabia’ya intikal eden Damat Mustafa Efendi Vakfı’ndan kiralı Yahûdîhane denilen evin 2/3 hissesinin başkasına devrine mahkeme tarafından izin verildiği Mahmiye-i İstanbul’da Topkapısı kurbünde Ahmed Paşa mahallesi ahâlîsinden iken bundan akdem vefât eden İbrahim Efendi b. el-Hâc Mehmed Efendi’nin sulbî sagīr oğlu Lütfullah ile sulbiye sagīre kızları Fâtıma ve Râbia’nın min-kıbeli’l-ümm ceddeleri ve tesviye-i emirlerine kıbel-i şer‘den mansûb vasiyyeleri olup zâtı ta‘rîf-i şer‘î ile mu‘arrefe olan işbu râfi‘atü’l-kitâb Hadîce Hatun bt. Mustafa meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp vasiyyeleri olduğum sıgār-ı mezbûrûnun babaları müteveffâ-yı mezbûrun Havâss-ı Refî‘a kazâsı muzâfâtından kasaba-i Hasköy’de <> Merhûm Dâmad Mustafa Efendi Vakfı’ndan icâreteyn-i ma‘lûmeteyn ile lede’l-ahâlî ve’l-cîrân ma‘lûmü’l-hudûd ve’l-müştemilât yahudihâne ta‘bîr olunur [70b] menzilin üç sehim i‘tibârıyla iki sehmi ile’l-vefât taht-ı tasarrufunda olup ba‘de vefâtihî sıgār-ı mezbûrûna intikāl-i âdî ile intikāl etmeğin lâkin hisse-i mezkûrun hâsılı harcına vefâ etmediğinden mâ‘dâ harâba müşrif olup ta‘mîr ve termîme [sıgār-ı mezbûrûnun mal-ı müntakıleleri dahi olmamağla] sıgār-ı mezbûrûnun iki sehim hisseleri sûk-ı sultânîde ve mecmâ‘-ı nâs olan mahallerde ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedeli istirbâh olunmak sıgār-ı mezbûrûnun haklarında <> min-külli’l-vücûh enfa‘ ve evlâ olmağın sıgār-ı mezbûrûnun Yahûdîhâne’de olan iki sehim hisselerini âhara ferâğa kıbel-i şer‘den izin verilmek matlûbumdur dedikde vasiyye-i mezbûre Hadîce Hatun’un kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sâlifü’z-zikr kasaba-i mezbûrede vâki‘ Yahûdîhâne’de olan sıgār-ı mezbûrûnun iki sehim hisselerini sûk-ı sultânîde ve mecma‘-ı nâs olan mahallerde ba‘de’l-müzâyede ve inkıtâ‘ı’r-rağbe bedel-i misli ve ma‘rifet-i mütevellî ile âhara ferâğ ve bedeli istirbâh olmak üzere vasîyy-i mezbûra izin vermeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Ramazani’l-mübârek li-seneti semân ve erba‘în ve miete ve elf. Şuhûdü’l-hâl: Fahrü’l-kuzât İbrahim Efendi b. Ali, fahrü’l-kuzât Mustafa Efendi b. el-Hâc Mehmed Efendi, fahrü’l-kuzât Abdullah Efendi, es-Seyyid Mustafa Çelebi b. el-Hâc İsmail, es-Seyyid Mehmed b. es-Seyyid Mustafa, Ahmed Çelebi b. Ali, Hasan Çelebi b. Mehmed.