Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 272 Hüküm no: 206 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cebeci Çorbacısı Mustafa Ağa b. Ahmed’in, bahçesini Cebeci Çorbacısı Mustafa Ağa b. Mehmed’e sattığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde vâki‘ Dergâh-ı âlî -dâme mahfûfen bi’l-ma‘âlî- cebeciler[i] çor[ba]cılarından On Birinci Cemâ‘at odasında hâlâ çorbacı olan fahrü’l-akrân el-Hâc Mustafa Ağa b. el-Hâc Mehmed’in sâkin oldukları menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde mahalle-i mezbûrede sâkin Mustafa Ağa b. el-Hâc Ahmed meclis-i ma‘kūd-ı mezkûrda işbu râfi‘u’l-kitâb merkūm Çorbacı el-Hâc Mustafa Ağa mahzarında ikrâr ve takrîr-i kelâm edüp yedimde ırsen ve şirâen mülküm olup mahalle-i mezbûrede vâki‘ bir tarafdan makābir-i Müslimîn ve bir tarafdan Kazganîzâde Mustafa Ağa mülkü ve bir tarafdan Bostanoğlu Mehmed mülkü ve bir tarafdan benim âhar mülküm ile mahdûd derûnunda bir sagīr oda ve bir köşk ve bir limon? kışlası? ve bir su kuyusu ve bir kenîf ve iki sokak kapısı ve üç taş duvarı muhtevî eşcâr-ı müsmire ve gayr-ı müsmire bahçeyi cemî‘ tevâbi‘ ve levâhıkı ile tarafeynden îcâb ve kabûlü hâvî şurût-ı müfsideden ârî bey‘-ı kat‘î ile merkūm el-Hâc Mustafa Ağa’ya dört yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr dört yüz guruşu merkūm el-Hâc Mustafa Ağa’nın yedinden bi’t-tamam ve’l-kemâl ahz u kabz edüp ba‘de’l-yevm bahçe-i mahdûd-ı mezkûr merkūm el-Hâc Mustafa Ağa’nın mülk-i müşterâsı ve hakk-ı sırfı olmuşdur; keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr es-Seyyid Yakub ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Ramazani’l-mübârek sene 1148. Şuhûdü’l-hâl: Hacı Ahmed Efendi b. Mustafa, Mustafa Efendi b. el-müderris, İsmail Beşe b. Mustafa, Ali Ağa b. Abdullah, el-Hâc Ahmed b. Ser-kâtib, Ahmed Çelebi b. Esîrci, İbrahim Bey b., Mehmed Ağa b. Şükûfeci, el-Hâc Salih b., Hasan Çelebi b. Kutucu, Mustafa Efendi b. Mustafa.