Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 271 Hüküm no: 205 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Hasan’ın, Halil Beşe b. Hızır’ın varisi olduğuna hükmolunduğu Medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de İslâm Bey mahallesinde sâkin iken bundan akdem vefât eden Halil Beşe b. Hızır’ın ber-vech-i âtî ve hasran vârisi olduğunu iddi‘â eden işbu râfi‘u’l-kitâb Ahmed Beşe b. Hasan meclis-i şer‘-i şerîf-i enverde müteveffâ-yı mezbûrun er karındaşı kızı Emine bt. İsmail nâm sagīrenin tesviye-i umûruna kıbel-i şer‘den mansûb vasîsi olup zî-rahm cihetinden vârisi olmak zu‘muyla tereke-i müteveffâ-yı mezbûra bi-gayr-ı hakkın vaz‘-ı yed eden üvey babası Yusuf b. Abdullah mahzarında üzerine da‘vâ ve takrîr-i kelâm edüp <> müteveffâ-yı mezbûr Halil’in babası Hızır ile benim babam Hasan li-ebeveyn karındaşlar olup babaları ismi Kara Hızır ve dedeleri ismi Abdullah ve anaları ismi Râziye ve maskat-ı re’sleri vilâyet-i Anadolu’da Ginolu kazâsına tâbi‘ Sürdivan nâm karyeden olup ve müteveffâ-yı mezbûrun ben asabe-i nesebiye cihetinden vârisi olup benden gayri terekesine müstahıkk-ı âhar yoğiken vasîyy-i mezbûr Yusuf Çelebi tereke-i müteveffâ-yı mezbûra bi-gayr-ı hakkın vaz‘-ı yed eder; suâl olunup kasr-ı yedine tenbîh olunmak matlûbumdur dedikde gıbbe’s-suâl vasîyy-i mezbûr cevâbında tereke-i müteveffâ-yı mezbûra vaz‘-ı yedini ikrâr lâkin müdde‘î-i mezbûrun ber-vech-i muharrer vâris olduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden medîne-i mezbûrede İskele-i Kebîr’de sâkin Mehmed Beşe b. Ali ve Abdullah Beşe b. Hasan nâm kimesneler li-ecli[71a]’ş-şehâde meclis-i şer‘a hâzırân olup isre’l-istişhâd, fi’l-hakīka müteveffâ-yı mezbûr Halil’in babası Hızır ile işbu müdde‘î-i mezbûr Ahmed’in babası Hasan ile li-ebeveyn karındaşlar olup babaları ismi Kara Hızır ve dedeleri ismi Abdullah ve maskat-ı re’sleri vilâyet-i Anadolu’da Ginolu kazâsına tâbi‘ Sürdivan nâm karyeden olup müdde‘î-i mezbûr Ahmed Beşe asabe-i nesebiye cihetinden vârisi olup terekesine <> mezbûr Ahmed’den gayri müstahıkk-ı âhar olduğu ma‘lûmumuz değildir; biz bu husûsa bu vech üzere şâhidleriz; şehâdet dahi ederiz deyü her biri edâ-i şehâdet-i şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûrun verâsetine ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Şevvali’l-mükerrem li-seneti semân ve erba‘în ve miete ve elf. Şuhûdü’l-hâl: el-Hâc Mehmed b. İbrahim, Mustafa Beşe b. Abdurrahman, Mehmed Beşe b. Mustafa, Mustafa Efendi b. Hüseyin, Ahmed Efendi b. Mustafa, es-Seyyid Mehmed b. es-Seyyid Mustafa, İbrahim Çelebi b. Ömer, Abdullah Çelebi b. Abdurrahman, Abdullah Çelebi b. ve gayruhum.