Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 280 Hüküm no: 213 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun bt. Mustafa’nın küçük çocukları Mehmed ve Fatma’ya vasî tayini Medîne-i hazret-i Ebî Eyüb-i Ensârî -aleyhi rahmetü Rabbihi’l-Bârî-de Çavuş Kasım mahallesinde sâkine iken bundan akdem vefât eden Zeyneb Hatun bt. Mustafa’nın sadrî sagīr oğlu Mehmed ile sadriye sagīre kızı Fâtıma’nın tesviye-i emirlerine kıbel-i şer‘den bir vasî nasbı lâzım ve mühim olmağın sagīrân-ı mezbûrânın babaları olup mahmûdü’l-hâl idüği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olan işbu râfi‘u’l-kitâb <> Ahmed Efendi b. Derviş Ahmed’i hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri sagīrân-ı mezbûrânın tesviye-i emirlerine vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. [Fî] 10 min-Zilka‘de sene 1148. Şuhûdü’l-hâl: Mustafa Efendi b. Hüseyin, es-Seyyid Ahmed Efendi b. Abdülkerim, Ahmed Efendi b. Mustafa Efendi, es-Seyyid Mehmed b. es-Seyyid Mustafa, İbrahim Çelebi b. Ömer ve gayruhum mine’l-huzzâr.