Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 279 Hüküm no: 212 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycı Ali Çelebi b. Mustafa’nın üç dükkânının Mustafa Çelebi b. Hüseyin’e satıldığı Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Takyeci mahallesinde sâkin iken bundan akdem vefât eden Kalaycı Ali Çelebi b. Mustafa’nın hayatında sâkin olduğu menzile varup zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî etdikde müteveffâ-yı mezbûrun verâseti zevce-i menkûha-i metrûkesi Emine Hatun bt. Mehmed ile sulbiye kebîre kızları Zeyneb ve Ümmühani nâm hatunlara münhasıra ve tashîh-i mes’eleleri on altı sehimden i‘tibâr olunup sihâm-ı mezbûreden iki sehmi zevcesi mezbûreye ve yedişer sehmi kızları mezbûretândan her birine isâbeti tahakkukundan sonra zâtları İbrahim Ağa b. Mehmed ve Osman Çelebi b. Ali ta‘rîfleriyle mu‘arrefe olan mezbûrât Emine ve Zeyneb ve Ümmühani hatunlar meclis-i ma‘kūd-ı mezkûrda işbu râfi‘u’l-kitâb Mustafa Çelebi b. Hüseyin mahzarında her biri ikrâr ve takrîr-i kelâm edüp mûrisimiz müteveffâ-yı mezbûrun ile’l-vefât yedinde mülk ve hakkı olup mahalle-i <> mezbûre [73b] sûkunda vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât üç kepenk bir bâb kazzâz dükkânı ve yine lede’l-ahâlî ve’l-cîrân ma‘lûmü’l-hudûd ve’l-müştemilât iki kepenk bir bâb pabucî dükkânı ve yine lede’l-ahâlî ve’l-cîrân ma‘lûmü’l-hudûd ve’l-müştemilât bir bâb terzi dükkânlarda olan tashîh-i mezbûr üzere hisse-i şâyi‘alarımızı tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile mezbûr Mustafa Çelebi’ye yüz doksan guruşa her birimiz bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr yüz doksan guruşu mezbûr Mustafa Çelebi yedinden her birimiz bi-kadri’l-hısas alıp kabz eyledik; ba‘de’l-yevm zikr[i] mürûr eden dekâkîn-i merkūmûn mezbûr Mustafa Çelebi’nin mülk-i müşterâsı ve hakk-ı sırfı olmuşdur; keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Çukadâr Osman ve Muhzır es-Seyyid Mehmed ile meclis-i şer‘a gelüp her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-seneti semân ve erba‘în ve miete ve elf. Şuhûdü’l-hâl: Mustafa Ağa b. İbrahim, Ahmed Çelebi b. Mustafa, Hüseyin Efendi b. Ahmed, Mehmed Beşe b. Şa‘bân, Mustafa Beşe b. el-Hâc Mustafa, Uzun Mustafa Beşe b..