Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 283 Hüküm no: 216 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Ömer’in küçük oğlu Ömer’in ölen vasîsinin yerine yeni vasî tayini Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Defterdâr Kara Süleyman mahallesinde sâkin iken bundan akdem vefât eden Mehmed Ağa b. Ömer’in sulbî sagīr oğlu Ömer’in bâ-hüccet-i şer‘iye vasîsi olan Abdullah Çelebi b. Murad fevt olmağla <> vesâyet umûru hâlî ve mu‘attal kalmağın müteveffâ-yı mezbûrun yerine kıbel-i şer‘den bir vasî nasbı lâzım ve mühim olmağın emânet ile ma‘rûfe ve diyânet ile mevsûfe, her vechile vesâyet uhdesinden gelmeğe kādire idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mezbûrun vâlidesi işbu râfi‘atü’l-kitâb Safiye Hatun bt. Abdullah’ı hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri müteveffâ-yı mezbûrun yerine sagīr-i mezbûrun tesviye-i umûruna vasî nasb ve ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâbi‘-aşer min-Zilka‘deti’ş-şerîfe li-seneti semân ve erba‘în ve miete ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, Mahmud Beşe b. Safâ, es-Seyyid Mehmed b. es-Seyyid Mustafa, Ali Çelebi b. Abdullah ve gayruhum mine’l-huzzâr.