Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 283 Hüküm no: 217 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalaycı Ali Çelebi b. Mustafa’nın eşi Emine Hatun bt. Mehmed ile kızları Zeyneb ve Ümmügülsüm’ün, miras hususunda birbirlerinin zimmetlerini ibra ettikleri Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Arakıyecibaşı mahallesinde sâkin iken bundan akdem vefât eden Kalaycı Ali Çelebi b. Mustafa’nın verâseti zevce-i menkûha-i metrûkesi Emine Hatun bt. Mehmed ile sulbiye kebîre kızları Zeyneb ve Ümmügülsüm’e münhasıra ve tashîh-i mes’eleleri on altı sehimden i‘tibâr olunup sihâm-ı mezbûreden iki sehmi zevcesi mezbûre Emine Hatun’a ve yedişer sehmi kızları mezbûretândan her birine isâbeti tahakkukundan sonra zâtı Mehmed Çelebi b. İsmail ve Osman Çelebi b. İbrahim ta‘rîfleriyle mu‘arrefe olan mezbûre Emine Hatun meclis-i şer‘-i şerîf-i enverde üvey kızları olup zâtları kezâlik mu‘arrifân-ı mezbûrân ta‘rîfleriyle mu‘arrefe olan <> işbu râfi‘ateyi’l-kitâb mezbûretân Zeyneb ve <<Ümmühani>> Ümmügülsüm mahzarlarında ikrâr ve takrîr-i kelâm edüp zevcim müteveffâ-yı mezbûr Kalaycı Ali Çelebi zimmetinde mütekarrir ve ma‘kūdün-aleyh on guruş mehr-i müeccel ile sâir terekesinden sümün hisse-i şer‘iyem altmış guruş ki min-haysü’l-mecmû‘ yetmiş guruşu mezbûretân Zeyneb ve <<Ümmühani>> Ümmügülsüm’den taleb ve da‘vâ eylediğimde onlar dahi yedimde mülk-i müşterâm olup mahalle-i mezbûrede vâki‘ ma‘lûmü’l-hudûd ve’l-müştemilât menzilimi babaları müteveffâ-yı mezbûrun terekesinden olmak üzere, hisse-i şer‘iyemiz vardır deyü benden taleb ve da‘vâ eylediklerinde beynimizde münâza‘ât-ı kesîre ve muhâsamât-ı şedîde vâkı‘a olmuş idi; el-hâletü hâzihî beynimize muslihûn tavassut edüp beni matlûbum olan yetmiş guruşu kırk guruşa [olmak] üzere sulh eylediklerinde ben dahi sulh-ı mezbûru ba‘de’l-kabûl ve bedel-i sulh olan meblağ-ı mezbûr kırk guruşu mezbûretân Zeyneb ve <<Ümmühani>> Ümmügülsüm yedlerinden bi’t-tamam alıp kabz edüp meblağ-ı bâkī-i mezbûr otuz guruş ile zevcim müteveffâ-yı mezbûrun sâir terekesine müte‘allika âmme-i miras da‘vâsından üvey kızlarım mezbûretân Zeyneb ve <<Ümmühani>> Ümmügülsüm’ün zimmetlerini ibrâ ve ıskāt eylediğimde onlar dahi zikr[i] mürûr eden mülk menzil ile sâir tereke-i müteveffâ-yı mezbûra müte‘allika âmme-i miras da‘vâsından benim zimmetimi ibrâ ve ıskāt edüp vechen mine’l-vücûh ve sebeben mine’l-esbâb birbirimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilka‘deti’ş-şerîfe li-seneti semân ve erba‘în ve miete ve elf. Şuhûdü’l-hâl: Fahrü’l-kuzât Hüseyin Efendi, Mustafa Ağa b. İbrahim el-Mübâşir, es-Seyyid Ömer b. es-Seyyid Mustafa, Osman Çelebi b. Ali, Mehmed Çelebi b. İsmail, el-Hâc Süleyman b. Ahmed, Mahmud Çelebi b. Mustafa, Ahmed Çelebi b. Ömer, es-Seyyid Receb Odabaşı b. Mustafa, Mustafa Ağa b. İbrahim.