Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 424 Hüküm no: 501 Orijinal metin no: [67a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ali b. Mehmed’in evini karısı İsmihan bt. Mehmed’e satıp parasını ona hibe ettiği Mahmiye-i İstanbul’da Kabakulak mahallesi sâkinlerinden el-Hâc Ali b. Mehmed nâm kimesne meclis-i şer‘-i şerîf-i lâzımü’t-teşrîfde zevcesi bâ‘isetü’l-kitâb İsmihan bt. Mehmed nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân el-Hâc İbrahim ve Süleyman ibney Ali nâm kimesneler şehâdetleriyle şer‘an sâbit olan Mehmed Çelebi b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm ve hakkım olup mahalle-i mezbûrda vâki‘ iki tarafdan tarîk-i âm ve iki tarafdan âhar mülküm ile mahdûd bir bâb fevkānî oda ve bir sofayı müştemil menzilimi cemî‘ tevâbi‘ ve levâhıkı ile zevcem mezbûre İsmihan’a tarafeynden îcâb ve kabûlü hâvî bey‘-i bâtt-ı sahîh-i şer‘î ile sekiz bin akçeye bey‘ ve teslîm edip ol dahi iştirâ ve tesellüm ettikden sonra semen-i mezbûru mezbûre İsmihan’a hibe-i sahîha-i şer‘iyye ile hibe edip ol dahi ittihâb ve kabûl eyledi, min ba‘d menzil-i mahdûd-ı mezbûr merkūme İsmihan’ın mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sâlis ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Es-Sâbikūn.