Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 423 Hüküm no: 500 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ali b. Mehmed’in evini kızı Âişe Hatun’a sattığı ve câriyesini de ona hibe ettiği Mahmiye-i İstanbul’da Kabakulak mahallesi sâkinlerinden el-Hâc Ali b. Mehmed nâm kimesne meclis-i şer‘-i şerîf-i lâzımü’t-teşrîfde sulbiye kebîre kızı bâ‘isetü’l-kitâb Âişe bt. ( ) nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân el-Hâc İbrahim ve Süleyman ibney Ali şehâdetleri ile şer‘an sâbit olan Mehmed Çelebi b. Mehmed nâm kimesne mahzarında ikrâr ve takrîr-i kelâm edip bey‘-i âti’z-zikrin sudûruna değin yedimde mülküm ve hakkım olup mahalle-i mezbûrda vâki‘ bir tarafdan tarîk-i âm ve bir tarafdan Hoca Fâtıma nâm hâtunun mahalle-i mezbûre avârızına vakfı olan menzil bir tarafdan Medîne-i Münevvere vakfı’ndan olup Siyavuş Bey b. ( ) nâm kimesne tasarrufunda olan menzil ve bir tarafdan ba‘zen âhar mülküm ve ba‘zen zevcem İsmihan bt. Mehmed nâm hâtuna mukaddemâ semen-i ma‘lûma bey‘ ve teslîm ettiğim menzil ile mahdûd bir bâb fevkānî oda ve dehliz ve kenîf ve havluyu müştemil menzilimi cümle tevâbi‘ ve levâhıkı ile mezbûre Âişe Hâtun’a on beş bin akçeye bey‘-i bât ve teslîm edip ol dahi iştirâ ve tesellüm eylediğinden sonra semen-i mezbûru ve evsâfı beynimizde ma‘lûme Rûsiyyetü’l-asl Müstakīme bt. Abdullah nâm câriyemi mezbûre Âişe Hâtun’a hibe ve câriye-i mevsûfe-i mezbûreyi teslîm edip ol dahi ittihâb ve kabûl ve câriye-i mevsûfe-i mezkûreyi tesellüm eyledi, min ba‘d menzil-i mahdûd-ı mezbûr mülk-i müşterâsı ve câriye-i mevsûfe-i mezbûre mülk-i mevhûbudur, keyfe mâ teşâ’ ve tahtâr mutasarrıfı olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Es-Sâbikūn.