Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 294 Hüküm no: 222 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa b. Ahmed’in oğulları Ali ve Hüseyin ile vasîleri Mehmed b. Musa arasında vasîlik dönemine ait anlaşmazlığın sulh ve ibra ile sonuçlandığı Medîne-i Eyüb’de Cezerî Kasım Paşa mahallesinde sâkin iken bundan akdem vefât eden es-Seyyid Mustafa b. es-Seyyid Ahmed’in verâseti sulbî oğulları es-Seyyid Ali ve es-Seyyid Hüseyin’e münhasıra olduğu şer‘an zâhir ve müte‘ayyin oldukdan sonra mezbûr es-Seyyid Hüseyin’in karındaşı ve tarafından husûs-ı âti’l-beyânda vekîl olduğu Mehmed Çelebi b. Osman ve diğer Mehmed Çelebi b. Sefer şehâdetleriyle şer‘an sâbit ve sübût-i vekâletine hükm-i şer‘î lâhık olan mezbûr es-Seyyid Ali meclis-i şer‘-i şerîf-i enverde işbu râfi‘u’l-kitâb el-Hâc Mehmed b. el-Hâc Musa mahzarında bi’l-verâse ve bi’l-vekâle ikrâr ve takrîr-i kelâm edüp mezbûr el-Hâc Mehmed benim ve karındaşım müvekkil-i mezbûrun hâl-i sıgārımızda vasîmiz olmağla babamız müteveffâ-yı mezbûrdan müntakıl mâlından ber-mûceb-i defter-i kassâm-ı askerî yüz beş guruş ile hâric-i ez-defter ba‘zı terekesini vesâyeten ahz u kabz etmiş idin deyü mezbûr el-Hâc Mehmed’den bi’l-verâse ve bi’l-vekâle taleb ve da‘vâ eylediğimde ol dahi meblağ-ı mezbûru bi’l-vesâye kabz eylediğini ikrâr lâkin babanız müteveffâ-yı mezbûrun düyûn-ı müsbetesine edâ edüp zimmetimde bir akçe kalmadı deyü beynimizde münâza‘ât-ı kesîre ve muhâsamât-ı ekîde vâkı‘a olmuş idi; el-hâletü hâzihî beynimize muslihûn tavassut edüp beni merkūm el-Hâc Mehmed ile on beş guruş üzerine sulh eylediklerinde ben dahi sulh-ı mezbûru ba‘de’l-kabûl ve bedel-i sulh olan meblağ-ı mezbûr on beş guruşu merkūm el-Hâc Mehmed yedinden bi’l-verâse ve bi’l-vekâle ahz u kabz edüp ba‘de’l-yevm babam müteveffâ-yı mezbûrun terekesinden hâric-i ez-defter ve dâhil-i defter kalîl ve kesîr celîl ve hakīr ma‘lûm ve mechûle müte‘allika âmme-i miras da‘vâsından merkūm el-Hâc Mehmed’in zimmetini bi’l-verâse ve bi’l-vekâle ibrâ-i âmm-ı kātı‘u’n-nizâ‘la ibrâ ve ıskāt eyledim; vechen mine’l-vücûh ve sebeben mine’l-esbâb benim ve karındaşım müvekkil-i mezbûr es-Seyyid Hüseyin’in kat‘a da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Muharremi’l-harâm sene 1149. Şuhûdü’l-hâl: el-Hâc Mustafa Efendi b. eş-Şeyh Abdüllatif, İbrahim Ağa b. Ahmed, Mustafa Çelebi b. Hasan, diğer Mustafa Çelebi [b.] Berber Mehmed, Ali Beşe b. Süleyman, Ahmed Beşe b. Mehmed, İsmail Çelebi b. Musa, es-Seyyid Mehmed Çelebi b. Mustafa.