Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 296 Hüküm no: 224 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’dan oğlu Mehmed Emin’e intikal eden Sultan Bâyezid Evkafı’na ait tarla hisselerinin başkasına devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin iken bundan akdem vefât eden Mehmed Ağa b. Osman’ın sulbî sagīr oğlu Mehmed Emin’in tesviye-i umûruna bâ-hüccet-i şer‘iye vasîsi olan işbu râfi‘u’l-kitâb el-Hâc Mustafa b. el-mezbûr Osman meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp merhûm ve mağfûrun-leh Sultâ[n] Bâyezid Han -tâbe serâhu- hazretlerinin Evkāfı’ndan olup Havâss-ı Refî‘a kazâsı muzâ[fâ]tından Çekmece-i Sagīr nâhiyesine tâbi‘ lede’l-ahâlî ve’l-cîrân ma‘lûmü’l-hudûd ve’l-kıta‘ tarlalardan mütevellî temessüğü mûcebince müteveffâ-yı mezbûrun ile’l-vefât taht-ı tasarrufunda olup ba‘de vefâtihî sulbî sagīr oğlu Mehmed Emin’e intikāl-i âdî ile intikāl etmeğin tarlalar-ı mezkûrda olan sagīr-i mezbûrun müntakıl hisse-i ma‘lûmesi hâsıl[ı] harcına vefâ etmeyip ve sagīr-i mezbûrun zarûret-i nafakası dahi olmağla tarlalar-ı mezkûrdan intikāl-i âdîye binâen sagīr-i mezbûrun hissesi âhara ferâğ ve bedeli istirbâh olunmak [içün] kıbel-i şer‘den izin verilmek bi’l-vesâye matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri tarla-yı mezkûrda olan hisseleri ba‘de’l-müzâyede ve inkıtâ‘ı’r-rağbe bedel-i <> misli ve ma‘rifet-i mütevellî ile âhara ferâğa kıbel-i şer‘den vasîyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’r-râbi‘ min-Muharremi’l-harâm sene 1149. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Ahmed Çelebi b. es-Seyyid Abdurrahim, es-Seyyid Mehmed b. es-Seyyid Mustafa, İmâm-ı Câmi‘-i Kebîr Mehmed Efendi b., Hüseyin Çelebi b. Mehmed.