Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 297 Hüküm no: 225 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’ın, küçük oğlu Mehmed Emin’e intikal eden Sultan Selim Evkafı’na ait karlıklardaki hissesinin devrine mahkeme tarafından izin verildiği Medîne-i hazret-i Ebî Eyüb el-Ensârî -aleyhi rahmetü Rabbihi’l-Bârî-de Câmi‘-i kebîr mahallesinde sâkin iken bundan akdem vefât eden Mehmed Ağa b. Osman’ın sulbî sagīr oğlu Mehmed Emin’in tesviye-i umûruna bâ-hüccet-i şer‘iye vasîsi olan işbu râfi‘u’l-kitâb el-Hâc Mustafa Ağa b. el-mezbûr Osman meclis-i şer‘-i şerîf-i enverde takrîr-i kelâm ve ta‘bîr ani’l-merâm edüp merhûm ve mağfûrun-leh Sultân Selim Evkāfı’ndan yirmi dört sehim i‘tibâr olunan vilâyet-i Anadolu’da Yalakâbad kazâsına tâbi‘ Kocaili cebelinde vâki‘ ma‘lûmü’l-hudûd karlıklardan bir sehmine temessük-i mütevellî-i evkāf mûcebince müteveffâ-yı mezbûrun ile’l-vefât taht-ı tasarrufunda olup ba‘de vefâtihî sulbî sagīr oğlu Mehmed Emin’e intikāl etdikden sonra karlıklar-ı mezbûrda sehm-i mezbûrun hâsıl[ı] harcına vefâ etmeyip ve sagīr-i mezbûrun zarûret-i nafakası dahi olmağla karlıklar-ı mezkûrdan intikāl-i âdîye binâen sagīr-i mezbûrun mutasarrıf olduğu bir sehim hissesi ba‘de’l-müzâyede ve inkıtâ‘ı’r-rağbe bedel-i misli ile âhara ferâğ ve bedeli istirbâh olunmak sagīr-i mezbûr hakkında her vechile enfa‘ ve evlâ olmağın karlıklar-ı mezkûrda olan sagīr-i mezbûrun bir sehim hissesi âhara ferâğ ve bedeli istirbâh olunmak üzere kıbel-i şer‘den izin verilmek bi’l-vesâye matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri karlıklar-ı mezkûrda olan bir sehim hissesini ba‘de’l-müzâyede ve inkıtâ‘ı’r-rağbe bedeli [bedel-i] misli ve ma‘rifet-i mütevellî ile âhara ferâğa kıbel-i şer‘den vasîyy-i mezbûra izin vermeğin mâ-vaka‘a bi’t-taleb ketb olundu. Fi’t-târîhi’l-mezbûr, li’s-seneti’l-mezbûre. Şuhûdü’l-hâl: Eş-şâhidûnü’s-sâbıkūn.