Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 299 Hüküm no: 228 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli Kazaskeri Zeynelabidin Efendi tarafından Havass-ı Refîa kazası Askerî Kassamlığı’na 26 Muharrem 1149 tarihi itibarıyla yapılan görevlendirme Yâ Fettâh, yâ Rezzâk, yâ Allah, yâ Kerîm, yâ Rahîm, yâ Gafûr Fazîletlü, mekremetlü, meveddetlü sultânım hazretlerinin meclis-i şerîf-i sa‘âdet-redîfleri savbına merâsim-i ta‘zîm ve tekrîmi hâvî leâlî-i da‘avât-ı icâbet-nümâ mühâdâtı isrinde inhâ-kerde-i muhlisî budur ki: İşbu sene tis‘a ve erba‘în ve miete ve elf Muharremi’l-harâmının yirmi altıncı gününden kalem-[re]v-i hükûmetleri olan Havâss-ı Refî‘a kazâsının umûr-ı kısmet-i askeriyyesi taraf-ı muhlisîden cenâb-ı şerîflerine tefvîz ve sipâriş olunmuşdur. Me’mûldür ki kazâ-i mezbûrda vâkı‘a mevtâ-yı askeriyye muhallefâtını tahrîr ve terkīm ve beyne’l-verese bi’l-farîzati’ş-şer‘iye tevzî‘ ve taksîm buyuralar. Bâkī izz ü fazîlet dâim bâd. Mine’l-muhib es-Seyyid Zeynelabidin El-kādî bi-asâkiri Rumeli