Eyüp Mahkemesi 163 Numaralı Sicil (H. 1147-1149 / M. 1734-1736) cilt: 67, sayfa: 299 Hüküm no: 227 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükköy ahalisinden Kostantin v. Nikola’nın, küçük kardeşi Todor v. Yamandi’ye kalan adı geçen köydeki ½ ev ve ½ bağ hisselerinin, vasîsi Ahmed Beşe b. Abdullah tarafından başkasına satışına mahkeme tarafından izin verildiği Havâss-ı Refî‘a kazâsına tâbi‘ Küçük nâm karyede mütemekkin iken bundan akdem hâlik olan Kostantın v. Nikola’nın li-üm karındaşı Todor v. Yamandi nâm sagīrin bâ-hüccet-i şer‘iye vasîsi olan işbu râfi‘u’l-kitâb Ahmed Beşe b. Abdullah meclis-i şer‘-i enverde takrîr-i kelâm ve ta‘bîr ani’l-merâm edüp hâlik-i mezbûrun terekesinden sagīr-i mezbûra mevrûs olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât nısf menzil ve yine karye-i mezbûre hudûdu dâhilinde vâki‘ ma‘lûmü’l-hudûd nısf bağ mürûr-ı eyyâm ve kürûr-ı a‘vâm ile müşrif-i harâb ve mâil-i türâb olup nısf menzil ve bağdan gayri mal-ı müntakıli olmadığından mâ‘dâ nafaka ve kisveye dahi eşedd-i ihtiyâcı olmağın nısf menzil ve bağ sûk-ı sultânîde ba‘de’l-müzâyede semen-i misli ile âhara bey‘ ve semeni istirbâh olunmak sagīr-i mezbûr hakkında her vechile enfa‘ ve evlâ olmağın kıbel-i şer‘den izin verilmek matlûbumdur dedikde vasîyy-i mezbûrun kelimât-ı meşrûhası vâkı‘a mutâbık idüği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olmağın hâkim-i muvakkı‘-ı sadr-ı kitâb -tûbâ lehû ve hüsnü-meâb- efendi hazretleri nısf menzil ile nısf bağı sûk-ı sultânîde ba‘de’l-müzâyede semen-i misli ile âhara bey‘ ve semeni istirbâh olunmak üzere vasîyy-i mezbûr Ahmed Beşe’ye izin vermeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Muharremi’l-harâm li-seneti tis‘a ve erba‘în ve miete ve elf. Şuhûdü’l-hâl: Mehmed Beşe b. Abdullah, es-Seyyid Mehmed b. es-Seyyid Mustafa, Ali Beşe b. Mehmed, Yusuf Çelebi b. Mehmed, Ahmed Efendi b. Mustafa, Ahmed b. ( ), Papa Tanaş v. Duka, Kostantın v. Yamandi, Gavril v. Hristo, Lanbor v. Dimitri.