Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 425 Hüküm no: 503 Orijinal metin no: [67a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Bey b. Oruç’un, Mehmed’e emanet verdiği kaftanın parasını veya aynını alacağı Mahmiye-i İstanbul’da Cebehâne’de sâkin işbu bâ‘isü’l-kitâb Süleyman Bey b. Oruc nâm kimesne meclis-i şer‘-i şerîf-i lâzımü’t-teşrîfde Mehmed b. ( ) nâm kimesne mahzarında üzerine da‘vâ ve takrîr-i kelâm edip mezbûr Mehmed yedine bundan akdem yirmi esedî guruş kıymetli hil‘at ta‘bîr olunur kaftanımı bi tarîki’l-vedî‘a def‘ ve teslîm eylemişidim hâlâ mezbûrdan taleb ederim suâl olunsun dedikde gıbbe’s-suâl mezbûr Mehmed cevâbında müdde‘î-i mezbûr yedinden vech-i muharrer üzre kaftan-ı mezbûru ahzını ikrâr lâkin kaftan-ı mezbûru gāib ani’l-meclis Mehmed nâm kimesneye emânet vaz‘ eyledim deyû takrîrini mezbûr Mehmed ikrâr ve i‘tirâf etmeğin, ikrârı mûcebince zikr olunan kaftanın aynı mevcûd ise aynını değil ise kıymet-i şer‘îsini ba‘de’s-sübût müdde‘î-i mezbûr Süleyman Çelebi’ye edâ ve teslîme mezbûr Mehmed’e tenbîh birle mâ vaka‘a bi’t-taleb ketb olundu. Fi’l-yevmi’s-sânî aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hamdi Çelebi b. Hüseyin, İbrahim Çelebi b. Mehmed, Hasan Çelebi b. Ahmed.