Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 425 Hüküm no: 504 Orijinal metin no: [67a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Osman b. Ömer’in borcuna mukabil rehin verdiği eşyanın satılıp borcun ödendiği Mahmiye-i İstanbul’da Koca Mustafa Paşa kurbunda Hâcce Hâtun mahallesinde sâkin iken bundan akdem vefât eden Osman b. Ömer’in zevce-i metrûkesi Şahbaz bt. Abdullah nâm hâtun meclis-i şer‘-i şerîf-i lâzımü’t-teşrîfde Receb Çelebi b. Hacı Murad nâm kimesne mahzarında ikrâr ve takrîr-i kelâm edip müteveffâ-yı mezbûrun hayâtında mezbûr Receb Çelebi’ye deyni olan elli guruş mukābelesinde rehn ve teslîm ettiği kendi mülkü olan bir sîm kılıç ile benim mülküm olan yedi miskāl bir altın mezbûr Receb Çelebi’nin izni ve re’y-i hâkim ile sûk-ı sultânîde ba‘de’l-müzâyede ve inkıtâ‘i’r-rağbe bey‘ ettiğimde ancak kırk yedi buçuk guruş hâsıl olup semen-i mezbûru müteveffâ-yı mezbûrun deyni için mezbûr Receb Çelebi’ye verip ol dahi kabz eyledi dedikde, gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Süleyman Çelebi b. Hasan, Hasan Çelebi b. Ahmed, İbrahim Çelebi b. Mehmed.