Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 54 Hüküm no: 9 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ömer’in taşçı tâifesinden ve Dergâh-ı âlî neferlerinden vefât eden İbrahim’in vârisi olduğunu ispatlaması Vilâyet-i Rumeli’de Avlonya kazâsına tâbi‘ Halanbireş karyesinden olup Havâss-ı Refîʻa kazâsına tâbi‘ Makrihorya karyesinde sâkin bundan akdem vefât eden taşçı tâifesinden olup Dergâh-ı Âlî -dâme mafhûfen bi’l-maʻâlî- neferâtından altmış iki solak neferâtlarından olan İbrahim nâm müteveffânın ber-vech-i âtî verâset iddiʻâ eden işbu bâ‘isü’l-kitâb Hasan b. Ömer nâm kimesne meclis-i şer‘-i hatîr-i lâzımü’t-tevkīrde müteveffâ-i mezbûrun terekesine vaz‘-ı yed eden Dergâh-ı Âlî -dâme mahfûfen bi’l-maʻâlî- yeniçeri beytülmâl kabzına meʼmûr olan Ahmed Ağa’nın vekîl-i müsecceli ve beytülmâl nâzırı el-Hâc Süleyman Ağa b. el-Hâc Mustafa muvâcehesinde üzerine da‘vâ ve takrîr-i kelâm edip müteveffâ-i mezbûr İbrahim babam müteveffâ Ömer ile li-ebeveyn er karındaşlar olup babaları ismi Hüseyin ve dedeleri ismi Abdullah ve anaları ismi Fâtıma bt. Abdullah ve maskat-ı re’sler[i] vilâyet-i Rumeli’de Avlonya kazâsına tâbi‘ Halanbireş karyesinden olup mezbûr İbrahim’in min-ciheti’l-usûbeti’n-nesebiyye verâseti bana münhasıra olmuş iken müvekkil-i mezbûr Ahmed Ağa tereke-i müteveffâ-i mezbûra bi-gayr-ı vechin vaz‘-ı yed eder, suâl [olunup] kasr-ı yedine tenbîh olunmak bi’l-verâse matlûbumdur dedikde gıbbe’s-suâl mezbûr el-Hâc Süleyman Ağa müteveffâ-i mezbûr İbrahim’in terekesine bi’l-emâne vaz‘-ı yedini ikrâr ve ber-vech-i muharrer müddeʻâsını inkâr etmekle müdde‘î-i mezbûr Hasan’dan ber-vech-i muharrer müddeʻâsına mübeyyin beyyine taleb olundukda udûl-ı ahrâr-ı ricâl-i Müslimîn’den olup Taşçılar Kethüdâsı Ali Beşe b. Osman ve Abdullah Beşe b. Mustafa ve Salih Beşe b. Yusuf nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka vilâyet-i Rumeli’de Avlonya kazâsına tâbi‘ Halanbireş karyesinden olup Havâss-ı Aliyye kazâsına tâbi‘ Makrihorya karyesinde sâkin iken bundan akdem vefât eden taşçı tâifesinden altmış iki solak neferâtından olan İbrahim müdde‘î-i mezbûr Hasan’ın babası müteveffâ-i mezbûr Ömer ile li-ebeveyn er karındaşlar olup babaları ismi Hüseyin ve dedeleri ismi Abdullah ve anaları ismi Fâtıma bt. Abdullah ve maskat-ı re’sleri vilâyet-i mezbûrede mârru’z-zikr Halanbireş karyesi olup müteveffâ-i mezbûrun verâseti min-ciheti’l-usûbeti’n-nesebiyye müdde‘î-i mezbûr Hasan’a münhasıradır, gayrı vâris ve terekesine müstahikk-ı âhar olduğu ma‘lûmumuz değildir, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Hasan’ın verâsetine baʻde’l-hükm mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe li-sene sebʻa ve hamsîn ve mi’e ve elf. Şuhûdü’l-hâl: Mehmed Said Efendi b. İbrahim, Mehmed Efendi b. Ahmed, Ahmed Efendi b. Mustafa, es-Seyyid Mehmed Çelebi b. es-Seyyid Mustafa, Salih Beşe b. Yusuf, Abdullah Beşe b. Mustafa, Ali Beşe b. Osman, Cafer Beşe b. Hüseyin, Mehmed Beşe b. Nuh, Mehmed Çelebi b. Abdullah, Hüseyin Çelebi b. Mehmed, el-Hâc Murad Beşe b. Ali ve gayruhum.