Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 56 Hüküm no: 10 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un kocası Dellak Şahin Beşe’den intikal eden miras hissesini üvey kızı Afife Hatun’a satması Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Dellâk Şahin Beşe b. Abdullah’ın hayâtında sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffâ-i mezbûrun verâseti zevce-i menkûha-i metrûkesi Emine Hatun bt. Abdullah ile sulbiye kebîre kızı Afife Hatun’a münhasıra ve tashîh-i meseleleri sekiz sehmden i‘tibâr olunup sihâm-ı mezbûrdan bir sehmi zevcesi mezbûre Emine Hatun’a ve bâkī yedi sehmi kızı mezbûre Afife Hatun’a isâbeti tahakkukundan sonra zâtı Ahmed Ağa b. Mehmed ve Mustafa Ağa b. Mehmed ta‘rîfleriyle mu‘arrefe olan mezbûre Emine Hatun meclis-i ma‘kūd-ı mezkûrda üveyi kızı işbu râfiʻatü’l-kitâb mezbûre Afife Hatun mahzarında ikrâr ve takrîr-i kelâm edip zevcim müteveffâ-i mezbûrun ile’l-vefât yedinde mülk ve hakkı idiği müsbet olup mahalle-i mezbûrede vâki‘ bir tarafdan Odabaşı zevcesi menzili ve bir tarafdan Mehmed Çelebi menzili ve bir tarafdan benim âhar mülküm ve bir tarafdan tarîk-i âm ile mahdûd bir bâb fevkānî oda ve tahtında bir oda ve bir dehlîz ve kenîf ve havluyu muhtevî mülk menzilden isâbet eden bir sehm hisse-i şer‘iyyemi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile üveyi kızım mezbûre Afife Hatun’a on altı guruşa beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semeni olan meblağ-ı mezbûr on altı guruşu üveyi kızım mezbûre Afife Hatun yedinden bi’t-tamam ve’l-kemâl ahz u kabz edip baʻde’l-yevm menzil-i mahdûd-ı mezkûrda olan bir sehm hisse-i şer‘iyyem üveyi kızım mezbûre Afife Hatun’un mülk-i müşterâsı ve hakk-ı sırfı olmuşdur, keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan Çukadâr Feyzullah Çelebi ve Muhzır es-Seyyid Mehmed ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Muharremi’l-harâm li-sene semân ve hamsîn ve mi’e ve elf. Şuhûdü’l-hâl: Abdürrezzak Efendi b. el-Hâc Ali Efendi, Fahrü’l-akrân Ahmed Ağa b. Mehmed, Mustafa Ağa b. Mehmed, Mehmed Çelebi b. Mustafa, Haffâf Ömer Çelebi b. Mehmed ve gayruhum.