Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 59 Hüküm no: 14 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un vasisi olduğu kızı Emine için yaptığı harcamaların muhasebesi Tahakkuk-ı özr-i şer‘îye binâen zikri âtî husûsun mahallinde muhâsebesi görülmesi iltimâs olunmağın savb-ı şer‘-i hatîrden Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi [rahmetü] rabbihi’l-bârî-’de Selâhi Mehmed Bey Mahallesiʼnde vâki‘ Ümmügülsüm Hatun’un menziline varıp cemâʻat-i Müslimîn huzûrlarında akd-i meclis-i şer‘-i kavîm ettikde mahalle-i mezbûrede sâkin iken bundan akdem vefât eden mevâlî-i izâmdan Kürd Ömer Efendi’nin oğlu merkūm Ahmed Efendi’nin sulbiye sagīre kızı Emine’nin vâlidesi ve tesviye-i umûruna mansûbe vasîsi olan mezbûre Ümmügülsüm Hatun’un bi’l-vesâye makbûzu olan meblağdan sagīre-i mezbûrenin cihâzı için iştirâ eylediği eşyâ-i mütenevviʻa ile sagīre-i mezbûrenin mahalle-i mezbûrede vâki‘ bir bâb menzil mürûr-ı eyyâm ile harâb olup kābil-i süknâ olmamağla kıbel-i şer‘den mukaddemâ me’zûn olduğuna binâen menzil-i mezbûru ta‘mîr ve termîm ve sâir mesârif-i lâzımesine harc u sarf eylediğini mevlânâ-yı mezbûr mahallinde ketb u tahrîr ve ümenâ-i şer‘le meclis-i şer‘a gelip inhâ eylediği muhâsebesi defteridir ki ber-vech-i âtî zikr olunur. Fi’l-yevmi’s-sâmin min-Zilhicceti’ş-şerîfe li-sene sebʻa ve hamsîn ve mi’e ve elf. Şuhûdü’l-hâl: Serlevha-i kuzât-ı Mısriyye’den umdetü’l-kuzât Mehmed Necib Efendi, es-Seyyid Mehmed b. es-Seyyid Mustafa, Mustafa Efendi b. Hüseyin, İbrahim Çelebi tâbiʻ-i Necib Efendi, Ahmed Efendi b. Mustafa. Sagīre-i mezbûrenin mukaddemâ vasîsi olan el-Hâc Abdurrahman Efendi fevt olmağla mûceb-i defter-i muhâsebe sagīre-i mezbûrenin mâlından vasiyye-i mezbûrenin makbûzu: 250.200 akçe. Yalnız iki yük elli bin iki yüz akçedir. Minhâ el-mesârif: Vasiyye-i mezbûre Ümmügülsüm Hatun sagīre-i mezbûre için iştirâ eylediği şâlî cübbe ma‘a şerît 2.640 akçe Vasiyye-i mezbûre sagīre-i mezbûre için iştirâ eylediği Hatâî anteri 1.560 akçe Yine vasiyye-i mezbûre sagīre-i mezbûre için iştirâ eylediği telli hatâî şalvar 1.200 akçe Vasiyye-i mezbûrenin iştirâ eylediği hamam boğçası 1.080 akçe Vasiyye-i mezbûrenin iştirâ eylediği duhân kîsesi 1.200 akçe Vasiyye-i mezbûrenin iştirâ eylediği hamam seccâdesi 840 akçe [5a] Vasiyye-i mezbûrenin iştirâ eylediği yaldızlı sim kuşak 1.800 akçe Vasiyye-i mezbûrenin iştirâ eylediği iki aded kuşak kolanı 420 akçe Vasiyye-i mezbûrenin iştirâ eylediği dört aded cedîd yorgan 2.400 akçe Vasiyye-i mezbûrenin iştirâ eylediği on iki aded cedîd yasdık ve dört minder ve dört aded makʻad ve bir hasır 1.200 akçe Vasiyye-i mezbûrenin iştirâ eylediği kırmızı şilte 840 akçe Yine vasiyye-i mezbûrenin iştirâ eylediği cedîd Bursa çatması on iki yasdık 6.000 akçe Vasiyye-i mezbûrenin iştirâ eylediği üç aded çuka makʻad 3.240 akçe Vasiyye-i mezbûrenin iştirâ eylediği üç aded cedîd hasır 660 akçe Vasiyye-i mezbûrenin iştirâ eylediği cedîd döşek 920 akçe Vasiyye-i mezbûrenin iştirâ eylediği Bilecik boğçası ma‘a pûşîde astâr 1.320 akçe Vasiyye-i mezbûrenin iştirâ eylediği hamam tası ma‘a kül kutusu 240 akçe Vasiyye-i mezbûrenin iştirâ eylediği üç aded şamʻdân 240 akçe Vasiyye-i mezbûrenin iştirâ eylediği iki kahve ibriği 120 akçe Vasiyye-i mezbûrenin iştirâ eylediği beş aded Yanya zarfı 240 akçe Vasiyye-i mezbûrenin iştirâ eylediği beldârî anteri 1.200 akçe Vasiyye-i mezbûrenin iştirâ eylediği dokuz değirmî Edirne şalı 480 akçe Vasiyye-i mezbûrenin iştirâ eylediği kutnî anteri 600 akçe Vasiyye-i mezbûrenin iştirâ eylediği çuka kapı perdesi 240 akçe Vasiyye-i mezbûrenin iştirâ eylediği aba kapı perdesi 240 akçe Vasiyye-i mezbûrenin iştirâ eylediği işleme akçe kîsesi 600 akçe Vasiyye-i mezbûrenin iştirâ eylediği işleme destmâl 480 akçe Vasiyye-i mezbûrenin iştirâ eylediği sâde âl yemenî 390 akçe Vasiyye-i mezbûrenin iştirâ eylediği mantarî, sagīr 600 akçe Vasiyye-i mezbûrenin iştirâ eylediği bâlin yasdık 240 akçe Vasiyye-i mezbûrenin iştirâ eylediği yalancı kākum kürk 1.080 akçe Yekûn-ı eşyâ: 45.590 akçe. Yalnız kırk beş bin beş yüz doksan akçedir. #&# Ber-mûceb-i hüccet-i keşf menzil-i mezkûrun binâsına vasiyye-i mezbûrenin masrûfu 183.780 akçe Sagīre-i mezbûrenin mukaddem vasîsi olan el-Hâc Abdurrahman Efendi fevt oldukda sagīre-i mezbûrenin mâlından kendi umûruna bin guruş sarf eylediği İstanbul kassâmı efendi huzûrunda sâbit olmağla harc-ı hüccet ve i‘lâm ve meblağ-ı mezbûrun tahsîli için vasiyye-i mezbûrenin masrûfu 4.400 akçe Menzil-i mezkûrun keşfi için harc-ı hüccet ve i‘lâm ve ücret-i mi‘mâr ve kâtibiye ve hüddâmiye vasiyye-i mezbûrenin masrûfu 2.400 akçe Harc-ı detfer-i muhâsebe 1.200 akçe Kalemiye ve hüddâmiye 480 akçe Kaydiye 60 akçe Yekûn: 190.580 akçe. Yalnız bir yük doksan bin beş yüz seksen akçedir. Cem‘an yekûn: 237.910 akçe. Yalnız iki yük otuz yedi bin dokuz yüz on akçedir. Sahhe’l-bâkī bi-yedi’l-vasiyye-i mezbûre, meblağ: 12.290. Bâlâda mezkûr vasiyye-i mezbûrenin makbûzu olan iki yük elli bin iki yüz akçeden sagīre-i mezbûrenin menzili ve cihâzı ve sâir mesârif-i lâzımesine yalnız iki yük otuz yedi bin dokuz yüz akçesini harc u sarf edip vasiyye-i merkūmenin zimmetinde ancak on iki bin iki yüz doksan akçe bâkī kaldığı işbu mahalle şerh verildi.