Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 59 Hüküm no: 13 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Rahime adlı cariyesini satması Havâss-ı Refîʻa kazâsına tâbi‘ Mevlevîhâne Yenikapı hâricinde sâkin ve hâlâ Hâslar subaşısı fakrü’l-akrân İbrahim Ağa b. Halil Bey yüz elli yedi senesi Ramazani’l-mübârek on beşinci gününde Zengiyetü’l-asl Müslimetü’l-mille Rahime nâm câriye âbıka olmak üzere zabt edip mevsûfe-i mezbûrenin müddet-i örfiyesi tamam olmağla âbıka-ı mezbûre merkūm İbrahim Ağa bi’l-izni’ş-şer‘î semen-i misli ile beyʻ edip ve semeninden makbûzu olan meblağdır ki ber-vech-i âtî zikr olunur. Fi’l-yevmi’s-sâmin aşer min-Muharremi’l-harâm li-sene semân ve hamsîn ve mi’e ve elf. Âbıka-ı mezbûrenin semeninden merkūm İbrahim Ağa’nın makbûzu: 7.800 akçe. Yalnız yedi bin sekiz yüz akçedir. Minhâ el-mesârif: Dört ayda âbıka-ı mezbûrenin nafakasına masrûfu 1.800 akçe Müjdegâne 600 akçe Dellâliye 150 akçe Âbıka-ı mezbûr hâmil olmağla tevellüd eyledikde merkūm İbrahim Ağa’nın masrûfu 480 akçe Harc-ı defter ve kalemiye ve hüddâmiye ve kaydiye 150 akçe Resm-i emîn 720 akçe Harc-ı defter 360 akçe Cem‘an yekûn: 4.260 akçe. Dört bin iki yüz altmış akçedir. Sahhe’l-bâkī, meblağ: 3.540. Bi-yedi emîni’l-mezbûr. Yalnız üç bin beş yüz kırk akçedir.