Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 63 Hüküm no: 16 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Taşçı İbrahim Beşe’nin vasiyyetini yerine getiren vasisi el-Hâc Murad Beşe’nin görülen muhasebesi Havâss-ı Refîʻa kazâsına tâbi‘ Makrihora karyesinde sâkin iken bundan akdem vefât eden Taşçı İbrahim Beşe b. Hasan’ın sülüs-i muʻayyene ve gayr-ı muʻayyenesini tenfîze bâ-hüccet-i şer‘iyye vasiyy-i muhtârı el-Hâc Murad Beşe b. Ali’nin üzerine hasbî nâzırı olan müteveffâ-i mezbûrun karındaşı oğlu ve hasren vârisi Hasan Beşe ma‘rifetiyle merkūm el-Hâc Murad Beşe’nin görülen muhâsebesi defteridir ki ber-vech-i âtî zikr olunur. Fi’l-yevmi’l-hâmis ve’l-ışrîn min-Muharremi’l-harâm li-sene semân ve hamsîn ve mi’e ve elf. Vasiyy-i merkūm el-Hâc Murad Beşe’nin ber-mûceb-i defter-i kassâm sülüsden makbûzu: 101.786 akçe. Yalnız bir yük bin yedi yüz seksen altı akçedir. Minhâ el-mesârif: Iskāt-ı salât ve ta‘mîr-i hayr ve eyyâm-ı mu‘tâdede tabh-ı taʻâm ve itʻâm-ı fukarâ için ber-mûceb-i vasiyyet vasiyy-i mezbûrun masrûfu 12.000 akçe Vasiyy-i mezbûr ber-mûceb-i vasiyyet ma‘rifet-i şer‘le iştirâ eylediği on aded mushaf-ı şerîfe verdiği 12.000 akçe Müteveffâ-yı mezbûr ile zevcesi Âmine nâm müteveffiyenin rûhları için hatm-i şerîf tilâvet eden on nefer hâfızlara ber-mûceb-i vasiyyet vasiyy-i mezbûrun verdiği 5.406 akçe Mezbûr İbrahim Beşe fevt oldukda gece ile bekleyen imâm ve müezzine ve sâir fukarâya vasiyy-i mezbûrun verdiği 2.000 akçe Vasiyy-i merkūm ma‘rifet-i şer‘le fukarâya tasadduk eylediği 1.660 guruş Vasiyy-i merkūm el-Hâc Murad Beşe ber-mûceb-i vasiyyet aldığı ücret-i vesâyet 6.000 akçe Karye-i mezbûrede vâki‘ câmi‘-i şerîfi ve minâre ta‘mîrlerine müteveffâ-i mezbûrun vasiyyeti olmağla bâ-fermân-ı âlî mi‘mâr ağa taraflarından irsâl olunan mi‘mâr halîfelerine ve taraf-ı şer‘den giden kâtibe ve hüddâma verdiği ücret 3.000 akçe Karye-i mezbûre gidildikde mi‘mâr halîfelerine ve kâtibe ve hüddâm için bârgirlerine ücret ve taʻâmlarına vasiyy-i mezbûrun masrûfu 2.200 akçe [6a] Merkūm el-Hâc Murad Beşe vesâyet isbât ettikde harc-ı hüccet ve kalemiye ve hüddâmiye 3.000 akçe Harc-ı defter 1.000 akçe Kalemiye-i kâtib ve hüddâmiye 600 akçe Kaydiye-i defter ve hüccetler 120 akçe Yekûn: 63.986 akçe. Yalnız altmış üç bin dokuz yüz seksen altı akçedir. Sahhe’l-bâkī bi-yedi’l-vasiyyü’l-mezbûr: 37.800 akçe. Yalnız otuz yedi bin sekiz yüz akçedir. Vasiyy-i merkūm el-Hâc Murad Beşe üzerine hasbî nâzırı olan merkūm Hasan Beşe ma‘rifetiyle muhâsebesi görülüp karye-i mezbûrede vâki‘ câmi‘-i şerîf ve minâresi ta‘mîrleri için ancak ber-mûceb-i vasiyyet yalnız otuz yedi bin sekiz yüz akçe vasiyy-i mezbûrun yedinde mevcûd olup mâ‘adâsını bâlâ-yı defterde mastûr olan mahallere harc u sarf eylediği tahlîf olunmağın işbu mahalle şerh verildi.