Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 65 Hüküm no: 17 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mehmed’in hayattayken hanımı Safiye’yi vasi tayin etmiş olduğu Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Halil b. Ömer b. Abdullah’ın [Halil b. Mehmed b. Ömer’in] [Bu hükmün devamında ve bir sonraki hükümde ismin “Halil b. Mehmed b. Ömer” olduğu anlaşılmaktadır.] zevce-i menkûha-i metrûkesi ve ber-vech-i âtî vasiyy-i muhtârı olduğunu iddiʻâ eden işbu bâ‘isetü’l-kitâb Safiye bt. Abdullah nâm hatunun zâtı zeyl-i vesîkada muharrerü’l-esâmî Müslimîn ta‘rîfleriyle baʻde’l-muʻarrefe meclis-i şer‘-i şerîf-i enverde müteveffâ-i mezbûrun li-ebeveyn kız karındaşı Sâliha Hatun’un zevci ve tarafından husûs-ı âti’l-beyânda vekâleti mahzar-ı câhidde sâbit ve sübût-ı vekâletine hükm-i şer‘î lâhık olan Abdülfettâh Efendi b. el-Hâc Mustafa mahzarında üzerine da‘vâ ve takrîr-i kelâm edip zevcim müteveffâ-i mezbûr Halil b. Mehmed b. Ömer’in hâl-i hayâtında ve kemâl-i akl u sıhhatinde vefâtından bir sene mukaddem ben bi-emri’llâhi te‘âlâ vefât eylediğimde cemî‘ mâlımdan techîz ve tekfînim görüldükden sonra bâkī terekemin sülüsünü baʻde’l-ahz ve’l-kabz sülüs-i mezkûrdan ta‘mîr-i kabr ve ıskāt-ı salâtım için yirmi guruş harc u sarf oluna ve on beş guruş eyyâm-ı mu‘tâdede tabh-ı taʻâm ve itʻâm-ı fukarâ ede ve üçümde ve kırkımda ve senemde birer hatm-i şerîf olunup sevâbı rûhuma ihdâ ve mukābelesinde birer guruş verile ve bâkī kalan fazlası vücûh-ı birre harc u sarf oluna deyü vasiyyet ve tenfîzine beni vasiyy-i muhtâr nasb ve ihtiyâr eylediğinde ben dahi muvâcehesinde kabûl ve musırran alâ-îsâʼihî vefât etmekle müteveffâ-i mezbûrun terekesinden taleb eylediğimde müvekkile-i mezbûre Sâliha Hatun vermede taʻallül eder, suâl olunup alıverilmesi bi’l-vesâye matlûbumdur dedikde gıbbe’s-suâl mezbûr Abdülfettâh Efendi baʻde’l-inkâr müdde‘iye-i mezbûre Safiye Hatun’dan ber-vech-i muharrer müddeʻâsını mübeyyin beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre ahâlîsinden Mehter Mehmed Ağa b. Ali Ağa ve Abdülmümin b. Mustafa ve Kapudanzâde Mehmed Efendi b. Mustafa ve Mustafa Çelebi b. Mehmed ve Türbedâr İsmail Efendi b. Osman nâm kimesneler li-ecli’ş-şehâde meclis-i şer‘a hâzirûn olup isre’l-istişhâd fi’l-hakīka işbu müdde‘iye-i mezbûrenin zevci müteveffâ-i mezbûr Halil b. Ömer b. Abdullah hâl-i hayâtında ve kemâl-i akl u sıhhatinde vefâtından bir sene mukaddem ben bi-emri’llâhi te‘âlâ vefât eylediğimde cemî‘ mâlımdan techîz ve tekfînim görüldükden sonra bâkī terekemin sülüsünü baʻde’l-ahz ve’l-kabz sülüs-i mezkûrdan ta‘mîr-i kabr ve ıskāt-ı salâtım için yirmi guruş harc u sarf oluna ve on beş guruş eyyâm-ı mu‘tâdede tabh-ı taʻâm ve itʻâm-ı fukarâ ide ve üçümde ve kırkımda ve senemde birer hatm-i şerîf [tilâvet] olunup sevâbını rûhuma ihdâ ve mukābelesinde birer guruş verile ve bâkī kalan fazla vücûh-ı birre harc u sarf oluna deyü vasiyyet ve tenfîzine bizim huzûrumuzda mezbûre Safiye Hatun’u vasiyy-i muhtâr nasb ve ihtiyâr eyledikde mezbûre Safiye Hatun dahi muvâcehesinde vesâyet-i merkūmeyi kabûl ve musırran alâ-îsâʼihî vefât eyledi, biz bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm ve’t-tenbîh mâ-vaka‘a bi’t-taleb ketb olundu. Fî-selhi Muharremi’l-harâm li-sene semân ve hamsîn ve mi’e ve elf. Şuhûdü’l-hâl: Mehmed Efendi b. Ahmed, Mehmed Said Efendi b. İbrahim, Ömer Efendi b. İbrahim, es-Seyyid Mehmed Çelebi b. es-Seyyid Mustafa, Mehter Mehmed Ağa b. Ali Ağa, Abdülmümin b. Mustafa, Mustafa Çelebi b. Mehmed, Kapudanzâde Mehmed Efendi b. Mustafa, Ömer Ağa b. el-Hâc Mustafa, İsmail Efendi b. Osman, Hüseyin Çelebi b. Ali, Mehmed Çelebi b. Abdullah, Hüseyin Çelebi b. Mehmed.