Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 74 Hüküm no: 24 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid el-Hâc Mustafa’nın terekesinden hissesini almak üzere annesi Emetullah Hatun’a Seyyid Ali Ağa’nın vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Baba Haydar Mahallesiʼnde sâkin iken bundan akdem vefât eden es-Seyyid el-Hâc Mustafa b. el-Hâc Mehmed’in vilâyet-i Anadolu’da Kula kasabasında sâkine vâlidesi Emetullah Hatun’un hisse-i irsiyyesini ahz u kabz [ve] zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf ve diyânet ile mevsûf her vechile vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olan akrabâsından işbu râfiʻü’l-kitâb es-Seyyid Ali Ağa b. es-Seyyid el-Hâc Mehmed’i hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûre Emetullah Hatun’un hisse-i irsiyyeseni ahz u kabz ve zabt u hıfza vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’t-tâsiʻ min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Abdürrezzak Efendi b. el-Hâc Ali, Ahmed Efendi b. Ali, Mustafa Efendi b. Musa, el-Hâc Mehmed b. Hüseyin, Hüseyin b. Abdullah, Osman Çelebi b. Mahmud, Mehmed Çelebi b. Abdullah, Feyzullah Çelebi b. Hüseyin, Çukadâr Hüseyin Beşe ve gayruhum.