Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 91 Hüküm no: 43 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katledilen Hasan’ın Erzincan’daki hanımı ile çocuklarına Abdi b. Mehmed’in kayyım ve vasi tayin edilmesi Medîne-i Hazret-i Ebî Eyyüb el-Ensârî -radiye anhu rabbihi’l-bârî-’de Takyeci Mahallesiʼnde sâkin iken bundan akdem katîlen vefât eden Hasan b. Mehmed b. Abdullah’ın vilâyet-i Anadolu’da Erzincan kazâsında sâkine zevcesi Hadice bt. ( ) nâm hatun ile sulbî oğulları Halil ve İbrahim ve Ali ve Mustafa nâm sagīrlerin tesviye-i emirlerine kıbel-i şer‘den bir kayyım ve vasî nasb olunması lâbüd ve mühim olmağla sıgār-ı mezbûrûnun ammileri hâlâ mahalle-i mezbûrede sâkin vesâyet uhdesinden gelmeğe kādir olduğunu zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir ve mukarrer olan işbu bâ‘isü’l-kitâb Abdi b. el-mezbûr Mehmed nâm kimesneyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi gāibe-i mezbûre Hadice Hatun için kayyım ve sıgār-ı mezbûrûnun tesviye-i emirlerine vasî nasb u ta‘yîn buyurduklarında mezbûr Abdi deyü [dahi] ber-vech-i muharrer vesâyet-i mezbûreyi kabûl ve ber-vech-i muharrer hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mehmed Efendi b. Ahmed, Mehmed Said Efendi b. İbrahim, Ömer Efendi b. Osman, es-Seyyid Mehmed Çelebi b. es-Seyyid Mustafa, Mehmed Çelebi b. Abdullah, Hüseyin Çelebi b. Mehmed, Cerrâh es-Seyyid Salih Çelebi b. es-Seyyid Hüseyin, el-Hâc Ali b. Mustafa, Musa Bey b. Ömer, Mehmed Çelebi b. Ahmed ve gayruhum.