Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 93 Hüküm no: 45 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Palo v. Kaleb’in terekesindeki hissesini almak üzere oğlu Mano’nun vasi ve kayyım tayini Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de vâki‘ Eğrikapı hâricinde Cebecibaşı Mahallesi’nde Kara Mustafa bahçesi demekle ma‘rûf ve meşhûr olan bahçede müstecir iken bundan akdem hâlik olan Palo v. Kaleb nâm zimmînin vilâyet-i Rumeli’nde Istarova kazâsına tâbi‘ Dremedik? kazâsında [karyesinde] mütemekkine zevce-i metrûkesi Teno bt. Nikola’nın hisse-i irsiyyesini ahz u kabz [ve] zabt u hıfza ve kendüye îsâle kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf her vechile vesâyet uhdesinden gelmeğe kādir idiği zeyl-i vesîkada muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan işbu râfiʻü’s-sifr sulbî kebîr oğlu Mano zimmîyi hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûre Teno nâm Nasrâniye’nin hisse-i irsiyyesini ahz u kabz [ve] zabt u hıfza ve kendüye îsâle vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i merkūmeyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Saferi’l-hayr li-sene semân ve hamsîn ve mi’e ve elf. Şuhûdü’l-hâl: Mehmed Efendi b. Mehmed, İbrahim Ağa b. Mehmed, İsmail Beşe b. Hüseyin, es-Seyyid Mehmed b. es-Seyyid Mustafa, Ahmed Efendi b. Mustafa. Hüve Hutime bi’l-hayr. (Mühür)