Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 93 Hüküm no: 46 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb Ensari kazasına kadı tayini İzzetlü fazîletlü meveddetlü efendi hazretlerinin huzûr-ı fezâil mevfûrları hemvâre-i daʻavât-ı âliyât dellâlı tahiyyât-ı vâfiyât mühâdâtı siyâkında hemvâre mesned-nişîn-i izz ü âfiyât olalar, ba‘de hâze’l-mü’eddei mecî oldur ki, işbu sene-i semân ve hamsîn ve mi’e ve elf şehr-i Rebîʻülevvelîsi gurresinden kalem-i hükûmetleri olan Eyüb Ensârî kazâsının umûr-ı kısmet-i askeriyesi tarafımızdan cenâb-ı vâlâlarına tefvîz olunmağın gerekdir ki kazâ-i merkūmede vâki‘ mevtâ-yı askeriye muhallefâtını tahrîr ve terkīm ve beyne’l-verese alâ-mâ-farazallâhu te‘âlâ tevzî‘ ve taksîm buyurup rüsûm-ı mu‘tâdeyi taraf-ı mecîye îsâl buyurasız, bâkī hemvâre-i izz ü fazîlet bâd. Mine’l-muhib Mehmed Esad el-Kādı bi-asker-i Rumeli