Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 95 Hüküm no: 48 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un vârislerinin terekeden hisselerini alarak birbirlerinin zimmetlerini ibra etmeleri Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Çavuş Kasım Mahallesiʼnde sâkine iken bundan akdem vefât eden Ümmügülsüm Hatun bt. Abdulkādir’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin verâseti zevc-i metrûku Mehmed Çelebi b. Filan ile li-ebeveyn karındaşı oğlu el-Hâc Ömer’e ve li-ümmin karındaşı oğlu Mahmud Çelebi b. Ahmed’e münhasıra ve tashîh-i meselesi bi-tarîkı’l-adl yedi sehmden i‘tibâr olunup sihâm-ı mezbûreden üç sehmi zevc-i mezbûr Mehmed Çelebi’ye ve üç sehmi merkūm el-Hâc Ömer’e ve bir sehmi merkūm Mahmud Çelebi’ye isâbeti tahakkukundan sonra merkūmân el-Hâc Ömer ve Mahmud nâm kimesneler meclis-i ma‘kūd-ı mezkûrda müteveffât-ı mezbûrenin zevci ve terekesine bi’l-verâse vâzıʻu’l-yed olan işbu râfiʻü’l-kitâb mezbûr Mehmed Çelebi mahzarında herbirileri bi’l-verâse ikrâr-ı tâm ve takrîr-i kelâm edip mûrisimiz müteveffât-ı mezbûrenin terekesi tahrîr ve ba‘de ihrâci’l-mesârif ve’d-düyûn ber-mûceb-i defter-i kassâm tashîh-i merkūm üzere hissemize isâbet eden altı bin yüz sekiz akçeyi terekeden olmak üzere merkūm Mehmed Çelebi bize def‘ ve teslîm, biz dahi ber-vech-i muharrer meblağ-ı mezbûru merkūm Mehmed Çelebi yedinden herbirimiz bi’l-verâse bi-kadri’l-hısas ahz u kabz eyledik, baʻde’l-yevm husûs-ı mîrâsa müte‘allika âmme-i da‘vâdan merkūm Mehmed Çelebi’nin zimmetini herbirimiz bi’l-verâse ibrâ ve ıskāt eylediğimizde ol dahi kezâlik bizim zimmetimizi ibrâ ve ıskāt edip vechen mine’l-vücûh ve sebeben mine’l-esbâb katʻâ birbirlerimiz ile da‘vâ ve nizâ‘ımız yokdur [13b] dediklerinde gıbbe’t-tasdîki’ş-şer‘î mâ-vakaʻa hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan Çukadâr Ali Ağa b. Abdullah ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbiri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻi’l-evvel sene semân ve hamsîn ve mi’e ve elf. Şuhûdü’l-hâl: Osman Efendi b. İbrahim ve Süleyman Beşe b. Ali ve diğer Süleyman b. Mehmed, Ebûbekir Çelebi b. Ömer, Abdülkerim Efendi b. Yakub.