Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 94 Hüküm no: 47 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ömer’in vefât eden Ümmügülsüm Hatun’daki alacağını terekesinden tahsili Husûs-ı âti’l-beyânın mahallinde istimâ‘ ve tahrîri için savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Çavuş Kasım Mahallesiʼnde sâkine iken bundan akdem vefât eden Ümmügülsüm Hatun bt. Abdulkādir’in hayâtında sâkine olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde müteveffât-ı mezbûrenin zî-rahm cihetinden vârisi olan işbu râfiʻü’l-kitâb el-Hâc Ömer b. Mustafa meclis-i ma‘kūd-ı mezkûrenin müteveffât-ı mezbûrenin zevci ve terekesine bi’l-verâse vâzıʻu’l-yed olan Mehmed b. ( ) mahzarında üzerine da‘vâ ve takrîr-i kelâm edip müteveffât-ı mezbûre Ümmügülsüm Hatun bt. Abdulkādir b. Abdurrahman zimmetinde cihet-i karz-ı şer‘îden kırk beş guruş hakkım olup hatta müteveffât-ı mezbûre hâl-i hayâtında ve kemâl-i akl [u] sıhhatinde meblağ-ı mezbûr cihet-i merkūmeden zimmetinde bana vâcibü’l-edâ deyn olduğunu huzûr-ı Müslimîn’de kirâren ve mirâren ikrâr ve işhâd edip kable’l-edâ fevt olmağla terekesinden meblağ-ı mezbûru taleb eylerim, suâl olunsun dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Osman Çelebi b. İbrahim ve Ebûbekir Çelebi b. Mustafa nâm kimesneler li-ecli’ş-şehâde meclis-i ma‘kūd-ı mezkûrede hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Ümmügülsüm Hatun bt. Abdulkādir b. Abdurrahman zimmetinde cihet-i karz-ı şer‘îden işbu müdde‘î-i mezbûr el-Hâc Ömer’in kırk beş guruş hakkı olup hatta müteveffât-ı mezbûre Ümmügülsüm Hatun hâl-i hayâtında ve kemâl-i akl [u] sıhhatinde meblağ-ı mezbûr cihet-i merkūmeden müdde‘î-i mezbûr el-Hâc Ömer’e zimmetinde vâcibü’l-edâ ve lâzımü’l-kazâ deyn olduğunu huzûrumuzda kirâren ve mirâren ifrâz ve bizi işhâd eyledi, biz bu husûsa bu vech üzere şâhidleriz ve şehâdet dahi ederiz deyü herbirileri şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘den Çukadâr Ali Ağa b. Abdullah ve Muhzır es-Seyyid Mehmed b. es-Seyyid Mustafa ile meclis-i şer‘a gelip herbirileri alâ-vukū‘ihî inhâ ve takrîr etmeğin hükm-i merkūm tenfîz olunmağın mâ-vaka‘a bi’t-taleb ketb olundu. Fi’l-yevmi’s-sâlis min-Rebîʻi’l-evvel sene semân ve hamsîn ve mi’e ve elf. Şuhûdü’l-hâl: Abdülkerim Efendi b. Yakub, Ebûbekir Çelebi b. Ömer, Ebûbekir Çelebi b. Ömer, Süleyman Beşe b. Mehmed, diğer Süleyman Beşe b. Ali, Osman Efendi b. İbrahim.