Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 429 Hüküm no: 510 Orijinal metin no: [67b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. İbrahim’in kendisini suç töhmetiyle hapsedip cerimesini alan Hüseyin Ağa b. İbrahim’le olan davada anlaştıkları Fi’l-asl vilâyet-i Anadolu’da Kastamonu sancağında Sâhil kazâsına tâbi‘ Tırnami? nâm karyeden olup hâlâ mahmiye-i İstanbul’da Emîn Nureddin mahallesinde sâkin Mustafa Efendi b. İbrahim nâm kimesne meclis-i şer‘-i hatîr-i lâzımü’t-tevkīrde vilâyet-i Anadolu’da Antalya kazâsına tâbi‘ Evan? nâm karyeden olup sâbıkan zikr olunan Kastamonu sancağına mutasarrıf olan Hüseyin Paşa’nın ağalarından olan Hüseyin Ağa b. İbrahim tarafından husûs-ı âti’l-beyâna vekîl olduğu Ali Beşe b. Ahmed ve İsa Bey b. Hüseyin nâm kimesneler şehâdetleri ile şer‘an sâbit olan Hüseyin b. Abdülkerim nâm kimesne mahzarında ikrâr ve takrîr-i kelâm edip bin yetmiş bir senesinde mûmâ-ileyh Hüseyin Paşa zikr olunan sancağa mutasarrıf iken merkūm Hüseyin Ağa ağalarından olmağla senin karındaşın Mehmed nâm kimesne paşa-yı mûmâ-ileyhin ağalarından ( ) ağaçla darb etmişidi deyû beni karye-i mezbûrda ahz ve haps edip bi gayrı hakkın beş yüz esedî guruşum ile her bir re’si ellişer guruş kıymetli üç re’s atımı ve beş yüz akçe kıymetli sekiz re’s kara sığır ineğimi ahz u kabz etmeğin bundan akdem meblağ-ı mezbûr beş yüz esedî guruş ile zikri mürûr eden at ve ineklerin kıymet-i şer‘iyyelerini merkūm Hüseyin Ağa’dan da‘vâ eyledikde ol dahi inkâr etmeğin beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip da‘vâ-yı meşrûhamdan merkūm Hüseyin Ağa ile beynimizde yetmiş kıt‘a esedî guruş ile bir donluk kırmızı sof üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr ile zikr olunan sofu merkūm Hüseyin Ağa yedinden alıp kabz edip husûs-ı mezbûra müte‘allika da‘vâdan merkūm Hüseyin Ağa’yı ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Ağa b. İlyas, Hüseyin Çavuş b. Mahmud, Ali Bey b. Ömer, Ramazan b. Hasan, Feyzullah Efendi b. Fazlullah, Ahmed Çelebi b. Mehmed.