Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 428 Hüküm no: 509 Orijinal metin no: [67b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bir bostanda bulunan ceset için suçlanan Dimo v. Lazo’nun iyi haline kefil olunduğu Mahmiye-i İstanbul’da Topkapısı dâhilinde Kürkçübaşı mahallesinde vâki‘ Seyyid Mehmed Çelebi bahçesi demekle ma‘rûf bahçede bahçıvan olan bâ‘isü’l-kitâb Dimo v. Lazo nâm zimmî meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip bundan akdem mahmiye-i mezbûrda Sîmkeş mahallesinde vâki‘ Mehmed Efendi bostanında bir âdem katl olunmuş sen de bilir imişsin deyû bi gayrı hak beni mahmiye-i mezbûre subaşısı ahz ve haps etmeğin benim keyf-i hâlim ahâlî-i mahalle-i mezkûreden olup işbu hâzırûn bi’l-meclis olan müslimînden suâl olunup takrîrleri tahrîr olunması matlûbumdur dedikde, ahâlî-i mahalle-i mezkûreden İmâm Mustafa Efendi b. Şaban ve es-Seyyid Mehmed Çelebi b. es-Seyyid Mehmed ve el-Hâc Fîruz b. Abdullah ve Ömer Beşe b. Abdullah ve Mehmed b. Mustafa nâm kimesnelerden mezbûr Dimo’nun keyfiyyet-i hâli suâl olundukda mezbûr Dimo kendi hâlinde ve kâr-ı kesbinde olup bir cihetle mezbûrun sû-i hâline muttali‘ olmadık husûs-ı mezbûr merkūm Dimo’ya iftirâ-i mahzdır deyû her biri mezbûrun hüsn-i hâlini haber verdiklerinden sonra mezbûr Dimo’nun nefsine işbu hâzır bi’l-meclis olup kasaba-i Kasım Paşa’da Kulaksız mahallesinde bakkal olan Hristo v. Minho ve mahmiye-i mezkûrede Kaliçeciler köşkü kurbunda Mehmed Ağa bostanında bostancı olan Kiro v. Tolo nâm zimmîler kefîl olmağın mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, İbrahim Çelebi b. Mehmed, Gazanfer Bey b. Tevekkül, Ramazan b. Mehmed, İsmail b. Ali.