Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 121 Hüküm no: 75 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu tâifesinen Kosta v. Yani’nin terekesi için Süleyman Beşe b. Ahmed’i vasi tayin etmiş olduğu Husûs-ı âti’l-beyânın mahallinde istimâ‘ ve tahrîri iltimâs olanmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi Havâss-ı Refîʻa kazâsı mülhakātından Yedikule hâricinde mumcu tâifesinden iken bundan akdem hâlik olan Kosta v. Yani’nin hayâtında mütemekkin olduğu mumhâne[ye] varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde hâlik-i mezbûrun ber-vech-i âtî vasiyy-i muhtârı olduğunu iddiʻâ eden işbu râfiʻü’l-kitâb Süleyman Beşe b. Ahmed meclis-i ma‘kūd-ı mezkûrda hâlâ Hâslar’da beytülmâl kabzına meʼmûr olup tereke-i hâlik-i mersûma bi’l-emâne vaz‘-ı yed eden fahrü’l-akrân İbrahim Ağa b. Halil mahzarında üzerine da‘vâ ve takrîr-i kelâm edip hâlik-i mersûm Kosta v. Yani v. Yuvan târîh-i kitâbdan on gün mukaddem ben bi-emri’llâhi te‘âlâ hâlik olduğumda cemî‘ terekem ve zimem-i nâsda olan hukūkumu ahz u kabz olunup kadr-i ma‘rûf akçe ile lâşem için harc u sarf ve düyûn-ı müsbetem edâ [19b] olundukdan sonra bâkī kalan terekemi vilâyet-i Rumeli’de Agrafa kazâsında mütemekkin li-ebeveyn karındaşım Kotana’ya îsâl oluna deyü huzûr-ı Müslimîn’de beni vasiyy-i muhtâr nasb u ta‘yîn eylediğinde ben dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Kosta musırran alâ-îsâʼihî hâlik olmağla tenfîz-i vesâyâ murâd eylediğimde emîn-i merkūm İbrahim Ağa tereke-i hâlik-i mersûma bi-gayr-ı hakkın vaz‘-ı yed eder, suâl olunup kasr-ı yedine tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müddeʻâsını mübeyyine beyyine taleb olundukda udûl-ı ahrâr-ı ricâl-i Müslimîn’den olup sâlifü’z-zikr Yedikule hâricinde sâkin Mumcular Kethüdâsı Hüseyin Ağa b. Ahmed ve Yiğidbaşı İbrahim Ağa b. Rüstem nâm kimesneler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mersûm Kosta v. Yani v. Yuvan târîh-i kitâbdan on gün mukaddem ben bi-emri’llâhi te‘âlâ hâlik olduğumda cemî‘ terekem ve zimem-i nâsda olan hukūkum ahz u kabz olunup kadr-i ma‘rûf akçe ile lâşem için harc u sarf ve düyûn-ı müsbetem edâ olundukdan sonra bâkī kalan terekemi vilâyet-i Rumeli’de Agrafa kazâsında mütemekkin li-ebeveyn karındaşım Kotana’ya îsâl oluna deyü bizim huzûrlarımızda işbu müdde‘î-i mezbûr Süleyman Beşe’yi vasiyy-i muhtâr nasb u ta‘yîn eylediğinde ol dahi ber-vech-i muharrer vesâyet-i mezbûreyi muvâcehesinde baʻde’l-kabûl mezbûr Kosta zimmî musırran alâ-îsâihî hâlik oldu, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm vâki‘ hâli mevlânâ-yı mezbûr mahallinde ketb u tahrîr, ba‘dehû ma‘an baʻs olunan ümenâ-i şer‘le meclis-i şer‘a gelip herbiri alâ-vukū‘ihî inhâ ve takrîr etmeğin hükm-i mezbûr tenfîz olunmağın mâ-vaka‘a bi’t-taleb ketb olundu. Fi’l-yevmi’r-râbiʻ min-Cemâziyelâhir sene semân ve hamsîn ve mi’e ve elf. Şuhûdü’l-hâl: el-Hâc Mehmed Ağa b. Abdülmümin, Ali Hoca b. Mustafa, Mustafa Çelebi b. Ali, Kadri Beşe b. Mehmed, es-Seyyid Mehmed Çelebi b. es-Seyyid Mustafa ve gayruhum.