Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 125 Hüküm no: 78 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’dan intikal eden mirasdan küçük oğlu Mehmed Emin’e nafaka tayini Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Mustafa Ağa b. İbrahim’in sulbî sagīr oğlu Mehmed Emin[‘in] tesviye-i umûruna kıbel-i şer‘den vasîsi olan işbu râfiʻü’l-kitâb fahrü’l-akrân İbrahim Bey b. el-merhûm Selim Ağa meclis-i şer‘-i şerîf-i enverde takrîr-i kelâm ve tâʻbir ani’l-merâm edip vasîsi olduğum sagīr-i mezbûrun nafaka ve kisveye eşedd-i ihtiyâcı olmağla sagīr-i mezbûrun müntakil mâl-ı mevrûsundan kadr-i ma‘rûf nafaka ve kisve-bahâ farz ve takdîr buyrulmak matlûbumdur dedikde vasiyy-i mezbûrun kelimât-ı meşrûhası vâkıʻa mutâbık idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan hâkim-i sadr-ı kitâb tûbâ-lehû ve hüsnü-meâb efendi hazretleri sagīr-i mezbûra müntakil mâl-ı mevrûsundan beher yevm on beş akçe nafaka ve kisve-bahâ farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisvesine harc u sarfa ve lede’l-iktizâ istidâneye ve inde’z-zafer mâlından rücû‘a vasiyy-i mezbûra izin vermeğin mâ-vaka‘a bi’t-taleb ketb olundu. Fi’l-yevmi’l-hâdî min-Cemâziyelâhir sene semân ve hamsîn ve mi’e ve elf. Şuhûdü’l-hâl: Fahrü’l-kuzât Mehmed Efendi b. Mustafa, el-Hâc Mehmed Ağa b. Ömer Bostanî, Osman Ağa b. Mehmed Ağa-yı sadr-ı âlî, es-Seyyid Mehmed b. es-Seyyid Mustafa, Ahmed Efendi b. Mustafa.