Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 126 Hüküm no: 79 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın küçük oğlu Mehmed Emin’e vasisi Rahime Hatun’un vefât etmesi üzerine İbrahim Bey’in vasi tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkin iken bundan akdem vefât eden Mustafa Ağa b. İbrahim’in sulbî sagīr oğlu Mehmed Emin’in tesviye-i umûruna vasîsi olan Rahime Hatun bt. İbrahim fevt olup umûr-ı vesâyet hâli ve muʻattal kalmağla yerine kıbel-i şer‘den bir vasî nasb u ta‘yîni lâzım ve mühim olmağın emânet ile ma‘rûf ve diyânet ile mevsûf ve her vechile vesâyet uhdesinden gelmeğe kādir idiği [20b] zeyl-i kitâbda muharrerü’l-esâmî Müslimîn ihbârlarıyla müteʻayyen olan işbu râfiʻü’l-kitâb İbrahim Bey b. el-merhûm Selim Ağa’yı hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun tesviye-i umûruna vasî nasb u ta‘yîn buyurduklarında ol dahi vesâyet-i merkūmeyi kabûl ve hıdemât-ı lâzımesini kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâdî min-Cemâziyelâhir sene 1158. Şuhûdü’l-hâl: Fahrü’l-kuzât Mehmed Efendi, Mustafa Efendi b. Ahmed Efendi, el-Hâc Mehmed Ağa b. Ömer Bostanî, Osman Ağa b. Mehmed Ağa-yı sadr-ı âlî, es-Seyyid Mehmed b. es-Seyyid Mustafa.