Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 129 Hüküm no: 83 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Eyüb’ün Şemsperi Hatun tarafından vakfedilen evle ilgili Hatice Hatun’a açtığı davadan vazgeçmesi Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ Mustafa Efendi b. Hüseyin irsâl olunup ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Câmi‘-i Kebîr Mahallesiʼnde sâkine Rukiye Hanım’ın menziline varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûrede Takyeci Mahallesiʼnde sâkin Mehmed b. Eyüb meclis-i ma‘kūd-ı mezkûrda zikri âtî menzile vaz‘-ı yedi mütehakkık olan işbu râfiʻatü’l-kitâb Hadice Hatun bt. Mehmed tarafından husûs-ı âti’l-beyânda tasdîka vekîl-i sâbitü’l-vekâlesi olan Ahmed Ağa b. Mehmed mahzarında ikrâr-ı tâm ve takrîr-i kelâm edip medîne-i mezbûrede Cezerî Kasım Paşa Mahallesiʼnde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb menzili bin elli yedi senesi Şemsperi nâm hatun evvelâ kendi nefsine, ba‘de vefâtihâ kızı Fâtıma’nın evlâd-ı evlâd-ı evlâdına vakf edip mezbûre Fâtıma’nın ben evlâdından olmak üzere menzil-i mezkûr bana meşrûtdur deyü bundan akdem müvekkile-i mezbûre Hadice Hatun’dan tasdîr eylediğim da‘vâ-yı mezkûremde mübtil ve kâzib olup ber-vech-i muharrer menzil-i mezkûra müte‘allika âmme-i da‘vâdan müvekkile-i mezbûre Hadice Hatun’un zimmetini ibrâ ve ıskāt edip baʻde’l-yevm menzil-i mezkûra müte‘allik eğer benden da‘vâ zuhûr ederse lede’l-hükkâmi’l-kirâm mesmûʻa eylemesin dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb u tahrîr ba‘dehû ma‘an ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cemâziyelâhir li-sene semân ve hamsîn ve mi’e ve elf. Şuhûdü’l-hâl: Fahrü’l-akrân Halil Efendi Kâtib-i Bâbüssaâde, Yahya Bey b. Ahmed Efendi, İbrahim Ağa b. Mustafa, Ali Efendi b. Ahmed Efendi, Ahmed Efendi b. Salih Efendi, Mehmed Ağa b. Ali, Ömer Çelebi b. Hasan ve gayruhum.