Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 130 Hüküm no: 84 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un vârisi olmadığından beytülmâla kalan evin Mustafa Çelebi’ye satılması Husûs-ı âti’l-beyânın mahallinde ketb u tahrîri için savb-ı şer‘-i enverden Mevlânâ Mustafa Efendi b. Hüseyin irsâl ol dahi medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de vâki‘ mütevellîlere mahsûs odaya varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i Nebevî ettikde medîne-i mezbûrede Ahmed Dede Mahallesiʼnde sâkine iken bundan akdem vefât eden Hadice Hatun bt. Veli Bey’in zâhirde vâris-i ma‘rûfu olmayıp terekesi cânib-i beytülmâla âid olmağla medîne-i mezbûrenin beytülmâlını kabza meʼmûr olan fahrü’l-akrân es-Seyyid Ahmed Ağa b. es-Seyyid Mehmed meclis-i ma‘kūd-ı mezkûrda işbu râfiʻü’l-kitâb Mustafa Çelebi b. Veli mahzarında bi’l-emâne ikrâr-ı tâm ve takrîr-i kelâm edip müteveffât-ı mezbûrenin ile’l-vefât yedinde mülk ve hakkı olduğu müsbet olup sâlifü’z-zikr Ahmed Dede Mahallesiʼnde vâki‘ bir tarafdan Hoca Kadın mülkü ve bir tarafdan İsmail mülkü ve bir tarafdan Ali Beşe mülkü ve bir tarafdan tarîk-i âm ile mahdûd fevkānî ve tahtânî üç bâb oda ve sofa ve dehlîz ve kenîf ve havluyu muhtevî mülk menzilin bâ-hüccet-i şer‘iyye üç yüz altmış sehm i‘tibârıyla iki yüz on iki sehm hissesi cânib-i beytülmâla âid olmağın hisse-i mezkûr sûk-ı sultânîde baʻde’l-müzâyede ragabât-ı nâs bi’l-külliye münkatıʻa oldukdan sonra mezbûr Mustafa Çelebi üzerinde yirmi dokuz guruşda karâr edip ziyâde ile tâlib-i âhar zuhûr etmeyip ve meblağ-ı mezbûr hisse-i mezkûrun el-yevm semen-i misli olduğunu zeyl-i vesîkada muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer oldukdan sonra tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mustafa Çelebi’ye semen-i misli olan meblağ-ı mezbûr yirmi dokuz guruşa bi’l-emâne beyʻ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl ve kabz eylediğinden sonra semen-i misli olan meblağ-ı mezbûr yirmi dokuz guruşu vakf-ı şerîf için bi’l-emâne ahz u kabz edip baʻde’l-yevm menzil-i mahdûd-ı mezkûrda olan sâlifü’z-zikr iki yüz on iki sehm hisse-i mezbûr Mustafa Çelebi’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîk vâki‘ hâli mevlânâ-yı mezbûr mahallinde ketb u tahrîr ba‘dehû ma‘an baʻs olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cemâziyelâhir sene semân ve hamsîn ve mi’e ve elf. Şuhûdü’l-hâl: Şerbetçi Mustafa Çelebi, Ahmed Efendi b. Mustafa, es-Seyyid Mehmed b. es-Seyyid Mustafa, Hüseyin Çelebi b. Mehmed, Ömer Efendi el-Mukayyid, es-Seyyid Ömer b. ( ).