Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 142 Hüküm no: 97 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un vârislerinden Mora’daki kardeşi Mehmed’e kızkardeşi Ümmügülsüm Hatun’un vasi ve kayyım tayin edilmesi Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Mevlevîhâne Yenikapı hâricinde Merkez Efendi Mahallesiʼnde sâkine iken bundan akdem vefât eden Rukiye Hatun bt. İbrahim’in vilâyet-i Mora cezîresinde sâkin li-ebeveyn er karındaşı Mehmed’in hisse-i irsiyyesini ahz u kabz, zabt u hıfza kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûfe ve diyânet ile mevsûfe her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan li-ebeveyn kız karındaşı işbu râfiʻatü’l-kitâb Ümmügülsüm Hatun bt. İbrahim hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri mezbûr Mehmed’in hisse-i irsiyyesini ahz u kabz, zabt u hıfza vasî ve kayyım nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Recebi’l-ferd sene semân ve hamsîn ve mi’e ve elf. Şuhûdü’l-hâl: Yusuf Bölükbaşı b. Hüseyin, Musa Çelebi b. Halil, Mehmed Çelebi b. Mustafa, Mustafa Çelebi b. Mehmed, es-Seyyid Mehmed b. es-Seyyid Mustafa.