Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 142 Hüküm no: 96 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Papa Dimitri adlı çocuğun vasisi Yorgaki’nin üzerine dayılarının hasbi nazır tayin edilmeleri Havâss-ı Refîʻa kazâsına tâbi‘ Karfa nâm karyede mütemekkin iken bundan akdem hâlik olan Tomaya bt. Yanaki’nin sadrî [oğlu] Yanaki v. Papa Dimitri nâm sagīrin tesviye-i umûruna vasîsi olan Yorgaki v. Tarandafil’in üzerine hasbî nâzır nasb u ta‘yîn olunmak lâzım ve mühim olmağın emânet ile ma‘rûf her [vechile] nezâret uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârıyla lede’ş-şer‘i’l-enver zâhir ve mukarrer olan sagīr-i mersûmun hâleleri işbu râfiʻü’s-sifr Panayot v. Foti [ve] İskerlet v. Yanaki ve Yamandi v. Yanaki nâm zimmîleri hâkim-i muvakki‘-ı sadr-ı kitâb tûbâ-lehû ve hüsnü-meâb efendi hazretleri vasiyy-i mersûmun üzerine hasbî nâzır nasb u ta‘yîn buyurduklarında ânlar dahi herbiri nezâret-i mersûmeyi kabûl ve hizmet-i lâzımesin kemâ-yenbagī edâya taʻahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Recebi’l-mürecceb li-sene semân ve hamsîn ve mi’e ve elf. Şuhûdü’l-hâl: Mustafa Efendi b. Hüseyin, Ahmed Efendi b. Mustafa, es-Seyyid Mehmed Çelebi b. es-Seyyid Mustafa, es-Seyyid Ömer b. Ali ve gayruhum.