Eyüp Mahkemesi 175 Numaralı Sicil (H. 1157-1159 / M. 1745-1746) cilt: 71, sayfa: 157 Hüküm no: 113 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’un hayatta iken cariyesi Rahime bt. Abdullah’ı azat etmiş olduğu Medîne-i Hazret-i Ebî Eyyüb el-Ensârî -aleyhi rahmetü rabbihi’l-bârî-’de Defterdâr Kara Süleyman Mahallesiʼnde sâkine iken bundan akdem vefât eden Sâliha Hatun bt. Abdullah’ın verâseti zevc-i metrûku Esirci Ali Çelebi b. Abdullah ile babası mezbûr Abdullah Çelebi b. Abdullah’a münhasıra olduğu şer‘an zâhir ve müteʻayyen oldukdan sonra müteveffât-ı mezbûreye rıkk-ı sâbıkını mu‘terife olan işbu uzun boylu kara kaşlı kara gözlü Zengiyyetü’l-asl Müslimetü’l-mille bâʻisetü’l-kitâb Rahime bt. Abdullah meclis-i şer‘-i şerîf-i enverde müteveffât-ı mezbûrenin terekesinde bi’l-verâse vâzıʻayi’l-yed olan mezbûrân Ali Çelebi ve Abdullah Çelebi mahzarlarında üzerlerine da‘vâ ve takrîr-i kelâm edip seyyidem müteveffât-ı mezbûre Sâliha Hatun bt. Abdullah b. Abdullah’ın yedinde câriye-i memlûkesi olduğum hâlde hâl-i hayâtında ve kemâl-i akl [u] sıhhatinde fevtinden beş ay mukaddem huzûr-ı Müslimîn’de beni mâlından âzâd ve mülkünden ihrâc ve sâir harâir-i asliyyât zümresine ilhâk ve idrâc edip üzerimde hakk-ı velâdan gayrı hakkı bâkī kalmamağla mezbûrân Ali Çelebi ve Abdullah Çelebi rıkk olup terekeden olmak zuʻmuyla bi-gayr-ı hakkın bana vaz‘-ı yed ederler, suâl olunup sebîlim tahliye olunması matlûbumdur dedikde gıbbe’s-suâl mezbûrân Ali Çelebi ve Abdullah Çelebi cevâblarında mevsûfe-i mezbûreye bi’l-verâse vaz‘-ı yedlerini ikrâr lâkin mevsûfe-i mezbûrenin ber-vech-i muharrer müddeʻâsını inkâr edicek, müdde‘iye-i mevsûfe-i mezbûreden müddeʻâsını mütebeyyine beyyine taleb olundukda udûl-ı ahrâr-ı ricâl-i Müslimîn’den mahalle-i mezbûre sâkinlerinden Abdullah Çelebi b. Ebûbekir ve es-Seyyid Mehmed b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mevsûfe-i mezbûrenin seyyidesi müteveffât-ı mezbûre Sâliha bt. Abdullah b. Abdullah nâm hatun yedinde câriye-i memlûkesi olduğu hâlde hâl-i hayâtında ve kemâl-i akl [u] sıhhatinde fevtinden beş ay mukaddem müdde‘iye-i mevsûfe-i mezbûre Rahime’yi mâlından âzâd ve mülkünden ihrâc ve sâir harâir-i asliyyât zümresine ilhâk ve idrâc edip üzerinde hakk-ı velâdan gayrı hakkı bâkī kalmamışdır, bizler bu husûsa bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-taʻdîl ve’t-tezkiye şehâdetleri makbûle olmağın mûcebiyle baʻde’l-hükm mâ-vaka‘a bi’t-taleb ketb olundu. Fi’l-yevmi’t-tâsiʻ aşer min-Şaʻbâni’l-muʻazzam sene semân ve hamsîn ve mi’e ve elf. Şuhûdü’l-hâl: Müezzin Ali Efendi b. Mehmed, Süleyman Çelebi b. Abdullah, Abdullah Çelebi b. Mehmed, Ahmed Efendi b. Halil, Hüseyin Çelebi b. Mehmed, Ahmed Efendi b. Mustafa, Mehmed Said Efendi b. Mustafa, Mehmed Efendi b. Muslihiddin, es-Seyyid Mehmed b. es-Seyyid Mustafa, Musa Bey.